Dat wier mal wedder ´ne dulle Wihnachtsfieer. Väle Maaten sünd kamen un hemm´ ok  ehre Partner un Frünn´ mitbröcht. Dank de gaude Vörbereidung dörch Sigi hett alls wunnerbor klappt. De Kauken stünn´all up´n Disch un de Kaffe ward gliek bröcht. All´s schmeckte gaut. Dat geef noch´n poor Informationen von unsen Vörsitter Jens Anders, de ok alle Gäst hartlich begrüßte. Denn ward noch´n bäten klönt bet dat Wihnachtsprogramm los güng. Ditmal hett Eva de Dreihorgelspälers ut Lübstorf bestellt. Herr Niemann bröchte ´ne Dreihorgel un twei wiedere Lüd mit, de Stimmung makten. Dei Fru vertellte lütt Geschichten un süng mi ehre schön, oewer liese Stimm´ un de anner Kierl bröchte unse Maaten mit siene lustigen Witze tau´n Smüstern. Väle schöne Wihnachtsleeder keemen ut de Dreihorgel un all künnten mitsingen. Texthefte wieren ok prat. Eine utlaten Stimmung wier in den´n ganzen Saal. Dat ward schunkelt, sungen un sogor na den´n Schneewalzer danzt. Na ´ne Stunn´n verafschied´te sick dat Dreihorgelorchester, denn sei harr´n je noch ´n wieden Weg na Lübstorf trüchtauleggen. Sei wieren mit uns taufräden un wi mit sei ok.

Na dat väle Singen harr´n sei all Appetit up dat Abendäten. Dat geef as ümmer Antenkühl mit Rodkrut un Tüffelklüten. Unse Maaten hemm´ hulpen, dat all´s fix verdeilt un noch heit up de Dische keem. Dat hett wunnerbor schmeckt.

Nahdem alle satt un taufräden wieren ward noch´n bäten snackt un denn löste sick de Fieerrunn´ langsam up. Vörher wünschten sick all noch ein schönet un gesundet Wihnachtsfest un ein glücklichet “Nieget Johr”. Dat wier eine schöne Wihnachtsfieer. As jedet Johr hett uns Karin Tanz mit ehre Wihnachtsgestecke ´ne grote Freu makt. Dormit wür´n de Dische schmückt un wi dörften sei ok mit na Hus nähmen.

Hartlichen Dank dorför leiw´ Karin.

Text: Eva Dittberner

Fotos: Hartmut Christoph