Dat wier ´ne schöne Jubiläumsfieer

Lang hemm´ wi uns up dissen Dag vörbereit´t. Dor wier ´ne Arbeitsgrupp bild´t wor´n un ´nen Maßnahmeplan upstellt. För de Jubiläumsbroschür  hemm´ wi Schriewerslüd anspraken, mit de Bidd, uns  Riemels un Geschichten tau Verfügung tau stell´n. Denn müßten wi  Inladungskorten schriewen , Kostenvöranschläg von Druckerien inhalen, den Fieerrum organisieren , dat Kulturprogramm un dat Äten un Drinken afspräken. De gröttst Arbeit wier, de Broschür  tausamentaustell´n. Oewer, wi hemm´ dat all tau rechten Tiet schafft. Wi freuten uns up die Fieer un ick denk, de is uns ok gaut gelungen. An´n Sünndag, den 19.Januor, üm Klock half elben  in´t Restaurant Nordlicht  güng dat los. Väle Gäst sünd kamen un gratelierten hartlich un bröchten schöne Geschenke mit.

Jürgen Wittmüß un Sigrid Malewschik begrüßten de Vereinsmaaten un Gäst hartlich. Uns Vörsitter höll kort ´ne Räd oewer de Grünnung von uns´n Verein för 25 Johren un oewer unse betherige Arbeit, üm de plattdütsche Sprak tau erholl´n, tau plägen un an de junge Generation wierertaugäben. Uns Verein wür mit 22 Mitglieder gründ´t . Hüt sünd 77 Maatinnen un Maaten in´n Verein. Tau Fieer sünd ok 3 Grünnungsmitglieder wäst: Uwe Süssmilch, Renate Rega un Wolfgang Mahnke. Bi´n Inlat hett jedein unse Jubiläumsbroschür un ´ne Falttasch mit uns Logo krägen. Doroewer hemm´ sick all freut.

Uns Präsident Uwe Süssmilch  begrüßte ok hartlich alle Vereinsmaaten un Gäst un hett dat, wat de Plattdütsch-Verein siet 25 Johren dan hett kort vörstellt. Hei bedankte sick bi all de Vereinsmaatinnen un Vereinsmaaten, de sick aktiv för den Erholl von de plattdütsche Sprak insett´ten un dat Vereinsläben interessant makten.

Wi freuten uns sihr, dat de Medien oewer unsen Verein in de Zeitungen väl Gaudes schräben  un uns hartlich beglückwünscht hemm´. Dat wiest uns je, dat de plattdütsche Sprak nich vergäten is un wiererhen doran Interesse besteiht. De ganze Veranstaltung is gaut aflopen. Na un na gratelierten de Gäst, höll´n  ´ne korte Ansprak un oewerreikten Geschenke. Na dat Meddagäten hett uns Hans-Peter Hahn mit ein plattdütschet Programm ünnerholl´n. Dat hett all´n gefoll´n. Af un tau greep hei sick siene Treckfiedel un makte ok noch Musik. Dorna hett Thomas v. Widdern  tau ´ne amerikansche Versteigerung von uns Jubiläumsbauk upraupen. Eva Dittberner hett intwüschen von all de anwäsenden Autoren un Sponsoren de Ünnerschriften dorin schriewen laten un genau dit Bauk wür nu versteigert. De Erlös wier för de Kinnerkräwthülp in Rostock dacht. Ein Bedrag von 162,00 € keem tausamen. Den Erlös hemm´ wi bet 200,00€ upfüllt un an´n 25.01.2020 an Fru Prof. Dr. Gudrun Eggers oewergäben.

Na de Versteigerung geef dat noch Kaffe un Kauken. Besonners oewerrascht hett uns Urda Dubberke von de „Feierscheune Sievershagen” mit ´nen groten sülwstbackten Kauken. Dorup wier ´ne grote "25". De Kauken wür ok glieks verdeilt un hett all´n gaut smeckt. De Maaten un Gäst nutzten de Veranstaltung, üm sick ok ünnereinannder tau ünnerholl´n. Na dat Kaffedrinken wier de Fieer tau Enn´. Dat wier ein schöner Dag, den wi all tausamen biläwt hemm´.

Text: Eva Dittberner

Fotos: Hartmut Christoph, Ulli Köster, Hermann Peters, Doris Deutsch OZ