Wahlberichtsversammlung

Unse Wahlberichtsversammlung wier  gaut vörbereit´t .De Inladungen wieren rechttiedig rut, de Maaten hemm´ sick anmelld´t un wi wieren naug Lüüd, üm de Wahl von den niegen Vörstand orrig dörchtauführen. De Berichte würden bestätigt  un von all Maaten würd de Vörstand un de Revisionskommission entlastet. Denn güng dat an de Wahl. All de betherigen Vörstandsmitglieder sünd von de Vereinsmaaten wedder einstimmig wählt worden. As Dank för de gaude Arbeit geef dat för all ´nen Blaumenstruß.

De olle Vörsitter, Jürgen Wittmüß,  is ok wedder de niege Vörsitter, de Verträdung makt Sigrid Malewschik un Ulrich Köster is wedder för de Vereinskass verantwurtlich. All de annern Vörstandsmaaten beholl´n  ehre Tätigkeitsbereiche. Uns Präsident, de eis den Verein gründ´t hett, würd ok einstimmig wählt. Mit siene 84 Johr is hei ümmer noch ein tauverlässiger un flietiger Kierl, de niege Ideen inbringt un ok dorför sorgt, dat Geld in de Kass kümmt.    Nu geiht de Vereinsarbeit mit Kraasch un Maut un  niege Ideen wierer. Välen Dank an all de Maaten, de disse Veranstaltung ünnerstützt hemm´. Gaude Vörschläg geef dat von de Maaten tau uns Veranstaltungen "Klönsnack an´n Spinn-rad". Tau´n Anfang von de Sitzung harr´n wi noch eis ´ne schöne Upgaw´. Uns Vereinsmaat Wolfgang Wilken hett sienen 70. Geburtsdag hatt un hei bekeem ´nen Blaumenstruß mit Glückwunschkort un ´nen Inkopsgautschien von´n Vörsitter oewerreikt. Wolfgang  leist´t  ´ne gaude ihrenamtliche Arbeit in´t Schaulmuseum von de Sankt-Georg-Schaul in Rostock. Na de Wahl hett dat ein lütt Abendäten mit Schmoltbrot  gäben.

Wi harr´n ok noch leiwen Besäuk krägen. Klock söss keemen ca. 15 Plattsnacker ut den´n Berliner Rum. Sei setten sick tau uns, hemm´ mit uns äten un sick ok orrig vörstellt. Von Maaten ut beide Vereine würden lütte Döntjes un Riemels vördragen un ok oewer unse Arbeit ver-tellt. Uwe makte as ümmer un mit Bravour de Geschicht von de Mäkelborger Sturköpp  un  Marco  Höster  vertellte  uns von siene Arbeit as Redakteur von dat Hürblatt för Blinne un Seihbehinnerte. Wiedere Vördräg keemen von Ilse Melle, Jürgen Wittmüß, Jörg Bitter un Eva Dittberner. Dor keem denn ein passig Klönsnack bi rut. Sei hemm´ uns ok tau sick inlad´t.

Sihr fix vergüng de Tiet bi dat Kloenen. Sogor sungen hemm´ wi tausamen. Dat würd all lat un unse Gäst verafschied´ten sick un makten sick up den Weg in ehre Ünnerkunft. Dat wir noch ein schöner Afschlut von unse Wahlberichtsversammlung, denn  dor wur man plattdütsch snackt, dor fäuhlt man sick woll.

Fotos: Hermann Peters und Hartmut Christoph