Wahlberichtsversammlung an´n 25. Mai 2023

Unse Wahlberichtsversammlung wier orrig vörbereit´t un dürchführt wor´n. Tau de Dagesurdnung un de Kandidatenlist hett dat von unse Maaten keine Andräg för Ergänzungen un Ännerungen gäben. Jörg Bitter un Karin Möller hemm´ den Inlat makt un faststellt, dat von unse 70 Vereinsmaaten 34 anwäsend wieren. Dormit wieren wi beschlußfähig un de Wahl künnte dörchführt warden. As dat so bi son´ne Wahlen is, güng dat allet orrig na Protokoll.Thomas wier de Versammlungsleiter, Jürgen Wittmüß läste den Rechenschaftsbericht vör un ok de Finanz- un Revisionsbericht sünd vördragen worden. In de Diskussion keem tau´n Utdruck, dat Christine ´ne gaude Arbeit in´t EIZ makt un ümmer ´ne gaude Bedeiligung hett un Jörg Bitter wier ümmer för de Plattdütsch-Kinner dor. Dat Maandenbladd wür as Kontakt tau de Maaten beteiknet un Eva harr üm ´ne bädere Bedeiligung an Artikeln von de Maatinnen un Maaten bäd´t. De Vörstand wür denn entlast´t un denn sünd de niegen Kandidaten vörstellt un naeinanner wählt worden. De niege Vörstand besteiht nu ut de Maatinnen un Maaten: Jens Anders, Bernd Andres, Jörg Bitter, Eva Dittberner, Gerlinde John, Sigrid Malewschik un Jürgen Wittmüß. Uwe Süssmilch is wedder as Präsident wählt worden un as Revisionskommission Gerda Strehlow un Renate Anders. Ulrich Köster hett sick ut Öllersgrünn´ut den Vörstand verafschied´t un wi bedankten uns hartlich för siene gaude un gewissenhafte Arbeit. Na de Konstituierung stellte Uwe Süssmilch den Jens Anders as Vörsitter un Sigrid Malewschik as Verträderin vör. Hei bedankte sick bi allen betherigen Vörstandsmaaten, besonners bi Jürgen Wittmüß, för de gaude Vereinsarbeit un wünschte för de wiedere Arbeit väl Erfolg.

Uns nieger Vörsitter, Jens Anders, hett sick för dat Vertrugen bedankt un will wiererhen ´ne gaude Vereinsarbeit leisten un för den Erholl von de plattdütsche Sprak sorgen. Tau´n Afschluß geef dat noch ein fienet Programm von de Folkloregrupp „Nuurdwind“.

Text: Eva Dittberner

Fotos: Hartmut Christoph