Wahlberichtsversammlung

Unse Wahlberichtsversammlung hemm´ wi as Vörstand gaut vörbereit´t. Lang müßten wi täuben, bet „Corona” disse Veranstaltung taulaten hett. De Inladungen wieren rechttiedig rut, de Maaten hemm´ sick anmelld´t un wi wieren naug Lüüd, üm de Wahl von den niegen Vörstand orrig dörchtauführen. Uns Vörsitter, Jürgen Wittmüß, würdigte in sienen Bericht de gaude Arbeit von´n Vörstand un von de flietigen Vereinsmaaten, de ümmer tau Stell wieren, üm mittauarbeiden un tau helpen, üm uns Vereinsläben interessant tau maken.

All de Berichterstattungen würden bestätigt un de Vörstand würd von de anwäsenden Maatinnen un Maaten entlastet. Dorna würd wählt. All de vörschlagenen Maatinnen un Maaten sünd einstimmig wählt worden. In den niegen Vörstand is nu Jens Anders rinkamen. Uns betheriget Vörstandsmitglied, Jürgen Friedrichs, is ok in Afwäsenheit för siene Verdeinste laft worden un ward ok later noch ordentlich verafschied´t.

De olle Vörsitter, Jürgen Wittmüß, is ok wedder de niege Vörsitter, de Verträdung makt Sigrid Malewschik un Ulrich Köster is wedder för de Vereinskass verantwurtlich.

Uns Präsident, Uwe Süssmilch, de eis den Verein gründ´t hett, würd ok einstimmig wedder wählt. Mit siene 86 Johr is hei ümmer noch tauverlässig un bringt siene Erfoh-rungen in un sorgt ok dorför, dat Geld in de Kass kümmt.

Ok unse beiden Vereinsmaatinnen, Renate un Gerda, de ´ne gaude Arbeit in de Revisi-onskommission leist´t hemm´,  sünd wedderwählt worden. Thomas C.v. Widdern wier de Versammlungsleiter un ward uns ok in Taukunft as Ihrenvörsitter düchdig ünnerstütten. Nu geiht de Vereinsarbeit mit niege Ideen, Kraasch un Maut wierer. Välen Dank an all de Maaten, de ümmer för den Verein dor sünd un tatkräftig mithelpen.

In de Diskussionsrunn´ geef dat  gaude Vörschläg för uns Vereinsläben un unse Veran-staltungen. Ok för de Arbeit mit den´n Plattdütschunnerricht för Kinner un Erwachsene  sett sick Jörg Bitter wiererhen in un wiedere Helpers hemm´ sick meld´t. Disse gauden Gedanken sünd in dat Protokoll upnahmen wor´n.

Na de offizielle Veranstaltung keem ein leiwer Gast un Fründ tau uns un makte ein sihr schönet Programm. Wi begrüßten hartlich Klaus-Jürgen Schlettwein, leifvull "Schletti" nömt. All hemm´ nipping tauhürt, sick hoegt un düchdig mitsungen. Passig tau de Harwsttiet güng dat üm de Aust un oewer dat Bruktum in verläden Tieden.

Hartlichen Dank leif Schletti vör dissen schönen Vördrag. As Dank oewerreikt Sigi ´nen schönen Blaumenstruß.

Text: Eva Dittberner

Fotos: Hermann Peters