Vereinswihnachtsfieer

Alle Johre wedder kümmt de Wihnachtsmann! In dit Johr keem hei dat ierste Mal för uns in de "Trotzenburg". De Rum wier fieerlich schmückt un alle Maaten un ehre Partners orrer Frünn´ freuten sick up ´nen kommodigen vörwihnachtlichen Nahmeddag. Leider künnten ein poor von unse Maaten nich dorbi sien, dor sei krank wieren. Uns Vörsitter, Jürgen Wittmüß begrüßte all ganz hartlich un denn geef dat Kaffe un Kauken.

Je, un denn wier hei dor, de Wihnachtsmann. Hei keem mit höllsch Getöse un drei reizende Frugens in´n Schlepptau. Dei bröchten  mit lustige Rezitationen un bekannten Operettenmelodien  uns orrig in Stimmung.

Na ´nen Medley von bekannte Wihnachtsleeder, de all mitsingen künnten, verafschied´ten  sick unse Gäst ut dat Volkstheater Rostock. Wi seggten Danke mit ´nen wihnachtlichen Blaumenstruß.

Lang vör unse Wihnachtsfieer harr´n Sigrid, Maike un Thomas de Gewinne von de alljöhrliche Tombola leiwvull vörbereit´t. Ick glöw, dat kein von uns inschätzen kann, wurväl Mäuh un Tiet unse Maaten disse Arbeit kost´t. Wi bedankten uns hartlich bi Sigrid Krüger mit ´nen Blaumenstruß. Noch vör dat Abendäten warden de Lose verköfft un jedein wullt gewinnen. Manch einer wier so niegelich un müßt gliek nahseihn, ob sien Gewinn ok grot utföll. Pünktlich Klock söss geef dat unse traditionelle Antenkül mit Rodkrut, de mit Hülp von uns Maaten fix verdeilt worden wür. Tau´n Afschlut von uns kommodig Wihnachtsfieer würden de Tombolapriese verdeilt un denn makten sick unse Maaten un Gäst up den Weg na Hus.

Viellicht freuen sei sick up dat nächst Johr.

Välen Dank ok an unse flietigen Matinnen Karin Tanz, Heidrun Rother un Sigrid Krüger, de de Dische so schön inschmückt hemm´ mit Wihnachtsgestecke, Bastellien un Knabbertüchs.

Text: Sigrid Malewschik, in´t Plattdütsche oewerdragen: Eva Dittberner

Fotos: Hermann Peters