Vereinswihnachtsfieer

OZ-Medienhaus, Richard-Wagner-Str. 1A 18055 Rostock

Trüchblick up unse Vereinswihnachtsfieer an´n 14. Dezember 2017

Fien schmückt un fieerlich herricht´t wier de grote Saal in´n OZ-Gebäud. Ok Karin Tanz hett wedder dortau bidragen. Sei hett so as jedet Johr schöne Wihnachtsgestecke mit Wasslichter för de Dische mitbröcht. 

De Vereinsmaaten hemm´ sick up de Wihnachtsfieer freut un sünd tahlriek kamen. Uns Vörsitter, Jürgen Wittmüß, begrüßte de Maaten un Gäst. Sigrid Krüger harr ok all den Disch mit de leifvull inpackten Priese för de Tombola herricht´t. Sei hett mit Maike tausamen ein half Johr vörher de Geschenke inpackt un de Lose tausamenrullt.

Dat geef nu Kaffe un Kauken. Mandy Mormann un Elisa Schwark hemm´ wedder mit väle Helpers för uns backt. De Kauken hett wunnerbor schmeckt. All hemm´ düchdig taulangt. De Oogen wieren grötter as de Maag.

Nu wier de Tietpunkt dor, dat uns Gäst, Anke Gohsmann un Wolfgang Kniep keemen un uns ein sihr schönet Programm bröchten. Dat wier muksmüsken still. Mit inföhlsame Stimm´ hett Anke Gohsmann uns up de Wihnachtstiet instimmt. De Beid makten ein Programm oewer de Winter- un Wihnachtstiet mit Gitarr´, Gesang un ünnerhollsame Geschichten. Dat wier so schön, dat noch üm ´ne Taugaw´ bäden wür. Wolfgang Kniep hett ein poor von siene Bäuker dorbi hatt, de man köpen künn´. De wieren sihr begiehrt un fix utverköfft.

Wi bedankten uns hartlich un uns Vörsitter un Sigrid Malewschik oewerreikten ein poor Blaumen.

Nu keem Sigi mit den Lospott un hett dat mit Oewertügung schafft, all de Lose tau verköpen. Sigrid Krüger tellte dat Geld un oewergeef den Oewerschuß von 30,00 € an die Vereinskass. Dorför hartlichen Dank.

Bet tau´n Abendäten würd sick de Tiet verdräben mit Snacks ünnereinanner, oewer ok mit Ver-tellers un Riemels, de Wilhelm Münchow, Jörg Bitter, Jutta Albertzki un Marco Höster vördrägen hemm´. Uwe Süssmilch oewerbröchte de Grüße von Kurt Kaiser, de ut gesundheitliche Grünn nich dorbi sien künnt. Uwe wieste de farige Bäukerbox, de Kurt pünktlich tau de 800-Johrfieer von uns Hansestadt Rostock rutgäben hett. De Box mit söben Bäuker kost´ 60,00€.

Denn keem dat Äten up den Disch. Dat hett all lang na Antenbraden duft´t. Schön knusprig wier de Antenkül, dortau geef dat Tüffelklöß un Rotkohl. Dorna keem  ein Dessert, dat kum noch tau schaffen wier. As nu all satt un taufräden wier´n wür dat Geheimnis von de Tombola lüft´t. De Losnummern würden upraupen. Jedet Los wier ein Gewinn un wenn dat ok mal blot ein Trostpries wier.

Dat wier ´ne sihr gaude Fieer un hett all´n Maaten gefoll´ n.

Bedanken müchten wi uns bi all, de disse Veranstaltung organisiert un dörchführt hemm´, besonners ok bi dat Team von de OZ un von´n Catering.

Fotos: Hartmut Christoph und Eva Dittberner

Zurück