Dat Gestüt Ganschow

Wi wieren all sihr niegelich up de Pierd in Ganschow.  Wi harr´n schönet Wärer , bäder künnt dat gor nich sien. Man seggt je, wenn Engel up Reis gah´n lacht de Häwen. De Bus wier vull mit 47 Lüd. Dorbi wieren Vereinsmaaten un plattdütsche Frünn´.

Tau Begrüßung geef dat ´nen hartlichen Empfang mit´n lütt´n Krüterlikör.  Elena Schultz hett uns nu allet oewer dat Gestüt un oewer de Pierd vertellt.

Dat Gestüt is 1969 grünn´t wor´n un is dat gröttste von Mäkelborg-Vörpommern. Siet Juli

1995 is dat Gestüt in private Hänn´. De Leiter is Herr Friedhelm Mencke. De Pierdzuchtanlag hett ca. 300 Pierd. Dorvon sünd 30 Trakehner Zuchtstuten, de för Utduer un Härte berühmt sünd un ca. 50 Mäkelborger Zuchtstuten, de för den Furtbestann´ von de Pierdrassen sorgen. Dat gifft aewer ok ein poor Reitponnys. Alle Johr warden mihr as 70 Fahlen burn. Sei hemm´ gauden Utlop up ´ne Koppel von 150 ha. Ok de Lopställ sünd hell un gaut dörchlüftet. Dor künn man gaut Pierd sien. De Zucht is up Reitpierd utricht´t. Tauierst warden de Hingsten vörstellt. De hemm´ viellicht ein Temperament. Dat lütt Mäten künnt sei ja kum fastholl´n. Herrlich wier´n sei antauseih´n, so schier un blank, gaut plägt un vuller Kraasch. De Pierd hemm´ statsche Namen, so as: Sir Chamberlain, Chardonnay, Monden-glanz, San Patriano u.a. Nu wieste man uns de Stuten mit ehre Fahlen. Schön wieren sei antauseih´n.

Denn führte uns Elena na de Ställ. Hier wieren de Stuten mit ehre Fahlen. Dei güngen orrig leif mit de Fahlen üm. Wi hemm´ uns allet gaut ankäken. Dat wier ein schönet Biläwnis. Man künn´ de Pierd anfaten un oewerstraken.  Wi hemm´ ok all Meddagäten un Kaffe mit Kauken krägen un makten noch ´ne Kutschfohrt  dörch de Wischen un den Uurt. Dat hett all´n väl Freu makt. Ein Gruppenfoto hemm´ wi ok noch schafft.

 Text: Eva Dittberner

Fotos: Hermann Peters un Hartmut Christoph