Uns Vereinsutflug tau´n „Kutschenmuseum

So´n Vereinsutflug is ümmer wat Besonneret un man lihrt dorbi de eigen Heimat un väle interessante Lüd´ kennen. So ´nen interessanten Minschen lihrten wi ok in ´t Kutschenmuseum in Kobrow bi Sternberg kennen. Herr Rethmann, grad 80 Johr olt wor´n, hett uns hartlich begrüßt un ´nen Vördrag holl´n oewer siene Aktivitäten in Kobrow un Ümgäbung. Siene Sammlung von de Kutschen mit dortaugehürige Gägenstänn´ is blot ein lütt Deil von siene Leidenschaft. Hei hett väl för de Bewahner in de Gägend dan, Hüser un Karken renoviert un de Lannschaft wedder herricht´t un in Ordnung bröcht. Hei kümmert sick üm de Minschen un gifft ehr Arbeit un Wahnung. De Lannwirtschaft, de hei bedriwt is ´ne ümweltschonende un mit Hart för de Veih. In de Ställ hemm´ de Dierte väl Platz un dat Faudern, Sauberholl´n un Melken von de Käuh ward mit Roboters makt. Hei hett siene ganze Familie na Mäkelborg halt un sei hemm´ all ´ne verantwurtungsvulle Upgaw oewernahmen.

Tau de Rethmann AG & Co. KG tell´n Remondis, Rhenus Logistics un Saria Bio-Industrie. Dat sünd alls Betriebe de in de hütige Tiet passen, wiel sei biologisch, ümweltfründlich un nahaltig arbeiten.

Dat „Mecklenburgische Kutschenmuseum” besteiht siet Juni 2006. In fief grote Hallen sünd Wagens, Kutschen, Schläden un Taubehür ut 13 Länner tau seihn. Dat wier sihr interessant un wi sünd von Harry lustig dörch dat Kutschenmuseum führt worden. Hei hett ümmer ´ne Geschicht tau´n Smüstern tau vertell´n hatt. Ok de anner Grupp, de von´n Baas sülwst ´ne Führung krägen hett, wier begeistert. Wi sünd gaut versorgt wor´n. Gliek na de Führung geef dat ´nen zünftigen Tüffel-gulasch. Na dat Äten güng dat nu dörch de Lannschaft. Herr Rethmann wieste uns de Wischen, de Hüser wur siene Mitarbeiters wahnen un den Karkhoff mit de Kark, de hei ok wedder instand setzt harr. As Oewerraschung spälte hei uns sogor wat up de Orgel vör. Na unsen Spaziergang, de mit ´n Besäuk von´n Kaustall tau Enn´ wier, geef dat Kaffe un Kauken. Uns Vörsitter bedankte sick bi Herrn Rethmann mit ´ nen  groten Präsentkorf. Denn stiegen wi all wedder in den Bus un dat güng na Hus. Dat wier ein schönet Biläwnis.

Välen Dank ok an Prof. Wolfgang Methling, de disse schöne Reis organisierte.

Text: Eva Dittberner

Fotos: Hermann Peters un Hartmut Christoph