Vereinsutflug na Zingst

,

Trüchblick up unsen Vereinsutflug an´n 22. September 2016

Leiw´ Vereinsmaaten,
dat wier man ein gelungener Utflug na Zingst /Darss. Dat Wärer spälte gaut mit un Sigrid Malewschik hett all´s orrig vörbereit´t un dörchführt. De Bus wier gaut besett. Ümmer mihr Vereinsmaaten un ok Frünn´ freuen sick jedet Johr up unse Fohrt, de dortau bidrägt, uns Heimat bäder kennentaulihren.
Ditmal hemm´ wi den 140. Geburtsdag von Martha Müller-Grählert nutzt, üm dat lütt Museum in Zingst tau bisäuken. Dat wier man in dat Heimatmuseum ´ne lütte Stuw´ , de man för sei inricht´t har, aewer sihr utsagekräftig. Ok de oewrige Utstellung wier interessant. Hier hett Hans-Jürgen dat Leed "Wo de Ostseewellen trecken an den Strand" up siene Gitarr spält un all de Maaten un Gäst hemm´ mit Gesang instimmt.
De Biomarkt rundherüm hett ok siene Interessenten funnen. Dor wür´ probiert, utsöcht un ok köfft. ´Ne Oewerraschung wier dor de Leifmusik up den´n Markt. Schöne Folkloremusik künn´ man hüren un ok wat up Platt.
Denn güng dat wierer tau´n Schlösschen Sundische Wiese. Dor geef dat Meddagäten.
Nu führten wi mit den´n Bus na Prerow tau de Boddenründfohrt.
De "BALTIC STAR" stünn all bereit, de Dische wier´n indeckt. De Sünn´ schiente so hell un klor, dat Warer wier so glatt un schier. De Kaptain verklorte uns de Landschaft un de Dierte un Planten, de in un an´t Warer ehr Tauhus hemm´. Bi Kaffe un Kauken künnten wi uns ünnerholl´n un wecker na baben up Deck gahn wullte, de har´ frie Sicht up Warer un Land. Na de Schippsfohrt güng dat denn wedder mit ´n Bus na Hus.

Zurück