Vereinsutflug na Mirow

Schloss Mirow, Schlossinsel 1 17252 Mirow

Trüchblick up unsen Vereinsutflug na Mirow an´n 21. September 2017

Ditmal  güng de Reis mit´n Bus von  de Firma Bahls los. Kofahl hett nich naug Kapazität hat. Liekers hett alls klappt. Wi harr´n ´nen gauden Busfohrer, den Hans, ´nen niegen Bus, fründliche un lustige Gäst un ´ne fidele Reiseleiterin, unse Sigi. Thomas hett Geburtsdag hat un all hemm´ em düchdig grateliert, mit ein Riemel von Eva, mit Geschenke un ein grot "Hallo". Thomas rückte denn ok so´n poor "Lütt- un Lütt" rut un nu würd ok noch tauprost´t. Lustig un fidel sünd wi denn in Mirow ankamen. Von dat Durhus halte uns de Inselführerin af un wieste uns de Seihenswürdigkeiten in´n Park.

Fix güng  dat mit de Führung, denn wi müßten pünktlich tau´n Äten in´n Ritterkel-ler sien. Wi wieren aewer all noch in de  Kark un bi de Leiwesinsel. Dor würd denn ok dat Gruppenfoto makt.

In´n Ritterkeller sünd wi zünftig von den Kellermönch in Empfang nahmen worden. Dor täufte up uns ein deftiget un rieklichet Äten. De Kellermönch vertellte Geschichten ut de Stadt Mirow in lustiger  un ok grugliger Wies. Besonners interessant wier de Geschicht von de Herrschaften von Mäkelborg-Strelitz. Twei regierende Hertög bzw. Grothertög sind hier geburn, Adolf Friedrich IV. , von Fritz Reuter ok Dörchläuchting nömt un sien Brauder, Grothertog Carl, de Vadder von de Königin Luise von Preußen.

Sophie Charlotte, de Swester von Adolf Friedrich un Carl heuratete 1761 Georg III.von England un is engelsche Königin wor´n. Mirow is ´ne geschichts-drächdige Stadt , de allerlei tau beiden hett.

Na dat Meddagäten güng dat nu up dat Schipp un wi makten  ´ne Fohrt  in den Müritz-Nationalpark. Wi schipperten midden dörch de Seerosen un ringsümher wier ´ne schöne ruhig Landschaft. In´n Schippsbug güng dat lustig tau. Dat geef wedder mal wat tau´n Äten, nämlich Kaffe un Kauken.

Jörg Bitter nutzte de Gelägenheit, nocheis för Thomas tau´n Geburtsdag ein Riemel vörtaudrägen un ein Leed tau singen. All makten mit un so güng denn unse schöne Reis tau Enn´. De Bus bröchte all wedder na Hus.

Välen Dank an de Organisatoren.

Fotos: Hermann Peters, Hartmut Christoph, Eva Dittberner

Zurück