Vereinsutfluch

Na väl Vörbereitung un Mäuh, de Busplätz tau besetten un uns Maatinnen un Maaten för disse Reis tau begeistern, hemm´ wi dat schafft, an´n 21. Harwstmaand mit den´ Kofahlbus los tau führen. Dat Wärer hett dat gaut mit uns meint. De Stimmung wier gaut un de Begleiterin von´n Busfohrer versorgte uns orrig mit Kaffe un anner Getränke. Tauierst güng dat tau´n Meddagäten in´t lütte Fischerdörp Kamminke. Dor sünd wi mit ´ne Välfalt von Fisch un Fleesch oewerrascht worr´n. So gauden Rökerfisch heff ick lang nich äten. Besünners hett mi de Lachs schmeckt. All langten düchtig tau. Sihr schön wier ok de Ümgäwung. Dicht an´t Wader wieren Dische un Stäuhle up ´ne Panoramaterrass stellt. Dor schmeckte dat Äten noch eis so gaut. Passig tau uns, hett de Fischrökerie “Klönsnack” heiten. Heidi hett sick gliek ´nen Aal gräpen för ein kommodiget Abendäten mit ehren Jürgen.

Na dat schöne Äten sünd wi wiererführt na Swinemünn. Dor künnten wi ein bäten up de Promenad butschern gah´n. Eine sihr schöne Stadt hemm´ wi seih´n. Alls wier dor sauber un ornlich. An´n Strand wieren noch vale Lüüd, de sick in de Sünn aalt un ok noch in´t Warer gah´n sünd.

Dat wier so heit, kum Schatten up de Strat. Unse drei Maatinnen up de Bänk müßten sick ierstmal utraugen. Väle bunte Kopladens, Bars, Hotels un Hüser wieren dor tau seih´n un ok schmucke Skulpturen ut Planten makt.

Nu keem uns Bus un dat güng na dat Waderschlott Mellenthin. De Schlottanlag ut dat Johr 1575 liggt midden in´n Naturpark von de Insel Usedom. De Beteiknung “Mellenthin” stammt ut dat Slawische un bedüt´t “Middelpunkt”. Schön utstatt´t  wier dat Schlott, all´ns elegant un fien. Dat geew dor ´ne Kafferösterie, ´ne  Brugerie, ´ne Limonadenmanufaktur, ´ne Destillerie, ein Restaurant un ein Café. In dit Café hemm´ wi uns dat kommodig makt. Dat wier so ´ne grote Utwahl an Kauken un Torten, dat wi uns sülwst anstell´n müßten, üm wat dorvon uttausäuken. Dat smeckte grotorrig.

De schöne Utfluch güng leider väl tau fix tau Enn´. Uns Bus stünn´ nu all prat un wi mak-ten uns up den´n Weg na Hus. De Rückfohrt wier kommodig, all wieren satt un taufräden. Wi freuen uns up den Utfluch in´t nächst Johr.

Hartlichen Dank an de Organisatoren.             

Text: Eva Dittberner

Fotos: Eva Dittberner, Karin Möller un Hartmut Christoph