Ein schöner Vereinsutfluch

So´n Vereinsutfluch is ümmer wat Besonneret in uns Vereinsläben. Väl Interessantet kann man biläwen un de eigen Heimat kennenlihren. Wi sünd an´n 16. September 2022 mit´n Kofahl-Bus mit 38 Lüüd losführt. Dat Wärer hett sick ganz gaut holl´n, aewer de Wind hett orrig weiht. All hemm´ sick up disse Reis freut, denn dörch CORONA künnten wi 2 Johr keine Fohrt maken.

In Wismar is unse Reiseleiterin taustä-gen. Dat wier ´ne fidele Fru, de uns de ganze Tiet mit väle interessante Verklo-rungen un Geschichten ünnerholl´n hett. Sei hett väl oewer de Gägend un oewer de Industrie wüsst. Sei wieste uns in Wismar gliek de Holtindustrie. Dat väle Holt wür dor verarbeit´t as Buholt, Faserplatten, Pellets un välet mihr. Denn sünd wi up de Insel Poel führt. Unse Reiseleiterin hett den Busfohrer oewer de ganze Insel lotst un uns allet wiest, wat interessant un seihenswürdig wier. An´n Strand hemm´ wi dat nich lang utholl´n, de Wind hett uns dull dörchpust´t. Wi sallten ok mit´n Schipp na Wismar führ´n, dat is aewer wägen den´n dullen Sturm nich möglich wäst. Wi sünd nu noch´n bäten up de Insel rümlopen, hemm´ Fischbrötchen äten und uns de Kark in Kirchdörp ankäken. Wierer güng dat denn mit´n  Bus na Wismar, wur wi, as Ersatz för de Schippsfohrt von Poel, ´ne Hafenrunnfohrt makten. Dat hett ok Spaß makt. Up´t Schipp hett Hans-Jürgen Schulze noch´n Lütten up sienen 70. Geburtsdag utgäben. De Kaptein hett de ganz Fohrt oewer wat von den´n Haben, de Gebäud, de Industrie, de Schäpen un von de ganz Ümgäbung vertellt. Hei wieste uns ok de schönsten Utblicke up Wismar.

Na dat Anleggen von´t Schipp makten wi noch´n Spaziergang dörch de Oltstadt un landeten up den Marktplatz. Dor vertellte uns de Reiseleiterin noch väl Interessantet oewer de Stadt un von de Waderkunst, de mirren up den Marktplatz steiht. Sei gellt as Wohrteiken von de Stadt un is ein Buwark na Pläne von den´n Utrechter Bumeister Philipp Brandin. Wismar hürte ´ne ganze Tiet tau Schweden un hett väle Belagerungen, Füer un Plünderungen oewerstahn müsst. Siet 1903 is denn Wismar wedder an Mäkelborg trüchgäben worr´n.

Uns Reiseleiterin verafschied´te sick un wi sünd denn mit´n Bus tau den´n Buernhoff SaBÖ führt. Dor hemm´ wi uns orrig mit Kaffe un Kauken stärkt. De Kauken hett sihr gaut schmeckt, hei wier aewer so grot, dat wi mit dat Upäten tau daun harr´n. Na dat Äten, hemm´ wi uns dor noch´n bäten ümseih´n. Wi käken uns de Schwien un dat Rotwild un ganz besonners den Hoffladen an. Dor wür ok noch allerhand köfft un lecker Saken mit na Hus nahmen. Uns Busfohrer hett uns denn säker wedder trüch na Rostock bröcht.

Dat wier ein schöner un erläwnisrieker Utfluch. All, de mitführt sünd, bedankten sick hartlich för de gaude Vörbereitung un Dörchführung von disse Reis. Dorför hartlichen Dank an Kofahl-Reisen, an Sigrid Malewschik un Eva Dittberner. Besonnerer Dank gellt ok unsen Busfohrer, de sick ümmer dörch de eng Straten dörchfriemeln müsst.

Text: Eva Dittberner

Fotos: Hartmut Christoph