Vereinsnahmeddag in de Trotzenburg

Forsthausbrauerei Trotzenburg, Tiergartenallee 6 18059 Rostock

Trüchblick up unsen Vereinsnahmeddag an´n 25. Januor 2018

De "Forsthausbrauerei Trotzenburg" is nu uns nieger Veranstaltungsurt. Mihr as 40 Maaten sünd kamen un wieren niegierig. Wi sünd dor gaut upnahmen wor´n. Uns Sigrid Malewschik hett ok ´ne Führung dörch dat Bruhus organisiert. Dat wier sihr interessant. Paul, de Bruger hett uns väl oewer dat Bierbrugen vertellt. Dorna geef dat noch ´n lütten Vördrag von Jens Andrasch oewer de Entwicklung von de Trotzenburg.

Dat hett hei sihr anschaulich makt. An de Wänn´ hüngen väle Biller mit Beschriebungen. An´n Anfang von de 1950er-Johre wier in de Trotzenburg ´ne Tuberkulose-Heilstation mit 80 Betten. Von 1954 bet 1989 wier dat  HO-Gaststätt. 2001 würd dat historische Gebäud tau ein Bruhus mit eigen Bierherstellung. Ick heff Paul,  den Bruger, fragt, wie man Bierbruger ward. Hei vertellte mi, dat man sick bewarben möt bi ´ne Brugerie. Denn is ´ne Lihrtiet von 3 Johren anseggt. De Berufsschaul wier in Bremen. Lihrt ward alls wat mit Bierherstellung tau dau´n hett, wie Warerupbereitung, Maischen, Würzen, de Gärung un dat Affüllen. De Prüfung hett hei bi "Becks" makt. Denn müßt hei Erfohrung sammeln bi den ollen Meister. Nu hett hei ein Azubi un brugt mit em tausamen leckere Biersorten, de wi ok prauft un as gaut befunnen hemm´.

Uns Vörsitter hett all Maaten hartlich begrüßt un ein nieget Vereinsmitglied, Heidrun Rother, vörstellt. Denn geef dat Blaumen för Bernd Andres, de de Lücht von´n Nuurden na M/V halte. Dorbi hett hei unsen Verein in Hamburg gaut verträden. Alle Maaten un Gäst gratelierten hartlich.

Nu hemm´ wi düchtig snackt, Bier drunken un ok wat tau Äten bestellt. Denn keem Klaus Decker mit siene Treckfiedel dortau. Hei spälte as uptreckt un makte orrig Stimmung. Marco dröch ein Riemel oewer "Mien Herzing" ut Warnemünn´ vör un denn keem ok Hans-Jürgen Schulze in Fohrt un makte mit Klaus ein lütt Programm. All klatschten, süngen un schunkelten mit. So schön wier ein Vereinsabend all lang nich mihr. Dat nächst Mal fieern wi in de Trotzenburg Fasching un hoffen ok up so  ´ne gaude Stimmung un Beteiligung.

Fotos: Hartmut Christoph, Hermann Peters und Eva Dittberner

Zurück