Vereinsnahmeddag in de Trotzenburg-Wihnachtsfieer

Unse Wihnachtsfieer wier grotorrig. Väle Vereinsmaaten mit ehre Partner sünd kamen. Sigi hett wedder all´s gaut mit de Verantwurtlichen von de Trotzenburg afspraken un den Termin för de Anmellungen all´n Maatinnen un Maaten künnig makt. De ganze Aflop hett wunnerbor klappt. De Kaffe un Kauken stünn´ schon up´n Disch un schmeckte gaut. Bet tau´t Programm wier noch Tiet, üm noch´n bäten tau Klönen un wat tau Drinken tau bestell´n. Uns Vörsitter Jürgen un siene Stellverträderin Sigrid begrüßten de Lüd hartlich un wünschten allen frohe Wihnachten. Unse leiwe Karin Tanz hett, as jedet Johr, schöne Wihnachtsgestecke mit Lichter makt, obwoll sei sülwst nicht dorbi sien künn.

Dorför bedanken wi uns hartlich. Dei sünd up ehren Wunsch hen an flietige Vereinsmaaten verdeilt wor´n.

Na dat Kaffedrinken geef dat ein schönet plattdütschet Programm mit Anke Gohsmann un Wolfgang Kniep. De schönen Leeder, Geschichten un Riemels hemm´ uns sihr väl Spaß makt. Wi künnten sogor mitsingen. Ok ´nen lustigen Sketsch hett Anke mit uns makt, frie na Uschi Kurz. Dor güng dat Hart up. Hartlichen Dank dorför!

Sigrid Krüger un ehre Dochter Maike sorgten as ümmer för de Wihnachtstombola.De Lose verköffte Jutta Sühr. All´s wier leiwfull inpackt. Jedet Los wier ein Gewinn. Ein poor Maaten künnten dat gor nich aftäuben, de Gewinne uttaupacken. Dat geef ´nen orrigen Spaß. Hartlichen Dank för de väle Arbeit un de gauden Ideen.   40 Euro sünd as Erlös in de Vereinskass gahn.

Dat Abendäten mit Antenkühl, Rodkrut un Tüffelklüten hett sihr gaut smeckt. De Maaten hemm´ hulpen, dat all´s fix verdeilt un noch heit up de Dische keem. All´ süngen un snackten väl miteinanner un prosteten sick tau.

Uns Präsident, Uwe Süssmilch, hett sick dat nich nähmen laten, ein poor Würd  an  de  Vereinsmaatinnen  un Maaten tau richten un all´n ein schönet un gesundet Wihnachtsfest un ein glücklichet “Nieget Johr” tau wünschen.Tau´n Schluß makte uns Jörg Bitter noch ´ne Freu und süng ein schönet Leed oewer ´ne friedliche Wihnacht von Schletti. Dat wier ´ne schöne Wihnachtsfieer. Wi verafschied´ten uns un güngen denn vergnäugt na Hus.

Grüße von Anke Gohsmann un Wolfgang Kniep

Leiw’ Lüüd un Frün’n vun de „Rostocker 7“!

Wi müchten hüt ganz hartlich dorför danken, dat wi Juuch Wiehnachtsfier begleiten dörften un so leiw vun den’n Vörstand un all de Maaten upnahmen, betuddelt un rieklich verlahnt worden sünd! Uns hett d’ vääl Tauversicht gäben, dat wi na lange „Corona-Paus“ ümmer noch för Juuch singen, spälen un vertellen künn’n! Vääle vun Juuch stahn ja ofteins sülwst up de Bühn, bringen anner Lüüd Freud un kennen dat Gefäuhl, wenn vun ehr ok Freud un Warmnis wedder trüch kamen. Jüst so geiht uns dat bie Juuch ok ümmer, un dat is so vääl wiert in disse Tieden!

Vun de Gägend twüschen Elw un Schaalsee schicken wi Gröten an de Ostsee tau de „Rostocker 7“! Wi wünschen dissen inzigorigen e.V. noch ein langet Läben mit ümmer vääl Gedau för uns Plattdütsch! För’t niege Johr wünschen wi Gesundheit un Fräden, danken för nu all 10 (Anke) un 20 (Wolfgang) Johr Fründschaft un raupen Juuch tau:

„Kiekt mal wedder in!“

Vun Harten

Anke Gohsmann & Wolfgang Kniep

Text: Eva Dittberner

Fotos: Gerlinde John