WIR LIEBEN COOKIES
Vereinsnahmeddag in de Trotzenburg
Forsthausbrauerei Trotzenburg, Tiergartenallee 6 18059 Rostock
Vereinsnahmeddag mit Raisa an´n 31.10.24
Ein´ sihr schöner Nahmeddag wier dat mit Raisa, ehren Söhn Juri und ehre Frünn´ ut Wismar. Raisa wier väle Johr Vereinsmaatin bi uns un hett mit ehr Akkordeon un Gesang tau´n Gelingen von manch Vereinsabend bidragen. Sei hett de Folkloregrupp Nuurdwind ünnerstützt, is mit unse Plattsnacker bi Veranstaltungen upträden un hett mi dat Keyboard-Spälen bibröcht. Ok tau de Leeder von Ilse Frentz hett sei de Noten schräben. Raisa wier ein wiertvullet Mitglied in unsen Verein un wi freuen uns, dat sei nu mit ehre Frünn´ tau unsen Vereinsnahmeddag kamen is.´
Schöne Leeder hemm´ sei vördragen, ok plattdütsche wieren dorbi. De Volksmusik hett ehr dat andah´n. Wi künnten ok all mitsingen. Dat makte väl Spaß. Ehr Söhn Juri hett mit siene Danzinlagen dat ganze Programm uplockert. Ok hett hei ´ne sihr schöne Singstimm´. Besonners hett sick uns Präsident, Uwe, up dat Wedderseihn freut. Sei harr´n ein besonneret fründschaftlichet Verhältnis miteinanner. Hei hett Raisa düchdig ünnerstützt, as sei vör ca. 22 Johren in Rostock ankeem. Hei begrüßte sei hartlich un hett ok de Grupp´ willkamen heiten.
Schad, dat dat Programm na gaut ein Stunn´ tau Enn´ wier. Aewer Sigi hett noch ´ne Taugaw hemm´ wull´t mit dat Leed “Anneliese, worüm büst du böse up mi” Dor wier ok noch´n ganz Körperinsatz dorbi mit Klatschen in de Hänn´, un Kloppen up de Knei.
Eva hett sick denn orrig bi de Vördragenden bedankt un ´nen gauden Husweg wünscht.
Text: Eva Dittberner
Fotos: Sigrid Malewschik, Hartmut Christoph
Plattdütsch mit Rayisa Grygorenko un ehre Grupp ut Wismar.
