WIR LIEBEN COOKIES
Vereinsnahmeddag in de Trotzenburg
Forsthausbrauerei Trotzenburg, Tiergartenallee 6 18059 Rostock
Vereinsnahmeddag an´n 26.09.2024 mit Peter Wendt un Klaus Kronke
Ein Vereinsnahmeddag mal ganz anners. Wi harr´n uns Gäst inlad´t. Dat wieren Peter Wendt von´n „De Plattdüütsch Kring tau Schwerin“un Klaus Kronke ut Heiligendamm. Vereinsmaaten von uns hemm´ Peter Wendt bi ´ne Veranstaltung in´t Schleswig-Holstein-Hus in Schwerin kennenlihrt. Hei bröchte Klaus Kronke mit, de lange Tiet in Stavenhagen wahnte, gegenoewer von´t Fritz Reuter Hus.
Peter Wendt keem mit siene Gitarr un stimmte gliek dat Leed: “Dor bün ick tau Hus” an. Dorbi künnten wi all mitsingen. Klaus Kronke vertellte de Geschicht von de Verwesslung mit de Arftensupp un von den´n Intelligenztest. Dat güng ümmer hen un her, mal ein Leed mit de Gitarr und denn ´ne Geschicht tau´n Smüstern.
Wat passiert, wenn de “Künstliche Intelligenz” för dat Hus bestell´n deit? Sowiet dörf dat gor nich kamen. Denn güng dat noch üm dat Klobillet un de Volksherrschaft. Klaus spälte u.a.dat Leed von´n Finanzamt “Klau´n, klaun - Äppel wull´n wi klau´n”, dorna ein Leed oewer den Harwst un tau´ n Enn´ “Wo de Ostseewellen ….”
Dat wier ein sihr schöner un interessanter Vereinsabend. Wi bedanken uns hartlich bi Peter un Klaus un hoffen, dat sei nich dat letzt Mal bi uns wäst sünd. Uns Vörsitter, Jens Anders, begrüßte tau´n Anfang unse Gäst un tau´n Afscheed bedankte hei sick bi de Beiden un wünschte ´ne gaude Heimfohrt.
Wi makten uns dat denn noch´n bäten fidel un klönten bi Äten un Drinken bet wi Lust harr´n na Hus tau gahn.
Text: Eva Dittberner
Fotos: Hartmut Christoph un Eva Dittberner
Plattdütsch tau´n Smüstern un Hoegen mit Peter Wendt
