WIR LIEBEN COOKIES
Vereinsnahmeddag in de Trotzenburg
Forsthausbrauerei Trotzenburg, Tiergartenallee 6 18059 Rostock
Vereinsnahmeddag an´n Gräundunnersdag
Oftwors woll väle Maatinnen un Maaten noch wat för dat Paaschenfest vörbereiten müßten, keemen tau dissen Gräundunnersdag so an twintig Lüüd in de Trotzenburg. Oewer wat wier dat? Uns Versammlungsrum wier besett! Wohen nu? So müßten wi Ollen de hoge Trepp hochmarachen un seeten nu dor baben in son`n lütt Kabuff un hürten den Larm von unnen. „Oewer, Schiet an`n Bom!“ So, ans ümmer Jörg seggt. Wi makten uns dat kommodig. Tauierst begrüßte uns Siggi mit niege Vörschläg för unsen Utflug in`n Harwstmaand. Tau`n Bispill künnten wi na Feldberg führen. Denn hett woll fast Jedein wat vördragen. Wi hemmen uns orrig oewer de välen Riemels orrer Läuschen von Heidi, Hans-Werner, Jörg, Wilhelm, Uwe, Walter u.s.w. hoegt. Sogor uns niege Maatin Chrischi, hett sick uprappelt un wat von`n Osterhas vörläst! Besonners hemmen wi uns tau Hermann freut, de wedder so schön up sien lütt Gitarr spält un mit uns sungen hett. Denn harr Uwe noch `ne ganz besonnere Idee för `ne Spennenaktion. Hei bröchte väle Biller von ´nen Maler mit, de so up 50 x 60 cm vergröttert un deilwies all inrahmt wieren. So künnten wi sei ankieken un uns weck för 10 Euro as Spenn` för de Kinnerkräwtstation bestellen. Ick glöw`, dat wier `ne gaude Idee. De Tiet verleep fixing, so dat wi all wat tau`n Abenbrot bestellen künnten un uns denn mit frischen Maut un niege Kraasch verafschieden un uns ein gaudet Osterfest wünschen künnten.
Christa Winkelmann
