Vereinsnahmeddag in de Trotzenburg

Forsthausbrauerei Trotzenburg, Tiergartenallee 6 18059 Rostock

Den Vereinsnahmeddag harr´n wi uns ganz anners dacht.Eine Läsung mit Wolfgang Mahnke wier anseggt un uns Maaten freuten sick bannig dorup. Vörher müssten wi noch ´ne uterornliche Mitgliederversammlung dörchführen, dormit unse bereits wählten Vörstandsmaaten in ehre Funktionen dörch de Vereinsmaaten bestimmt wür´n. Dat hett ok ornlich klappt.

Kortfristig hemm´ wi erfohren, dat uns leiwer Fründ, Wolfgang Mahnke  krank wier. Dat wier sihr schad, oewer dat künnt man nu nich ännern. Wi wünschten em allet Gaude. Uns Vereinsmaat Thomas C.v. Widdern hett ´nen Oewerraschungsgast mitbröcht. Ein groter schlanker Kierl keem in de Dör un ward von Thomas vörstellt.

Zehnkampf-Olympiasieger Christian Schenk bi uns to Gast

Dat hemm´ wi noch nich hat, een Sportskanon' vertellt uns wat öwer Inklusion. Woans is dat dorto kamen? De ierste Snack mit Christian Schenk wier up den Plattdütsch Bäukerdag in'n Botanischen Gorden in'n Frühjohr verläden Johr. Un denn hemm Christian Schenk, Uwe Süssmilch un Thomas C. v. Widdern, sik an'n  21. November hensett un öwerlecht, wat könn' wi tosammen daun för dat hehre Ziel von den Verein                                           „all inklusiv Rostock e.V. “. De Tosamenkunft hett in'n komodigen Rahmen in dat Café von Galeria Kaufhof stattfunn.

För uns' Präsident wier disse Bespräkung ok ganz wat Besonneret, denn he kennt de Öllern von Schenk noch ut Kinner- un Jugendtieden. Nu mößten ja ierst Erinnerungen uttuscht war´n, wat man sik woll got bi uns' Präsidenten vörstellen kann. Dordörch is ne wunnerbore gelöste Atmosphär' entstahn'. Na disset „warm up“, woans dat Niechdütsch heit, hemm` wi uns öwer de nich ganz lichten Upgaben von Schenk's Verein unnerhollen.

Dat Ergäfnis wier denn ok de Inladung to uns Vereinsabend. Dor hemm´ wi denn in groter Runn' von Ergäfnisse un Vörhaben von Schenk's Verein, wo he Vörstandsvörsitter is, hürt.

All 2022 un 2023 is von den Verein mit groten Erfolg een Festival in Rostock för un mit Minschen mit körperlicher Behinderung orrer psychischer Beeinträchtigung dörchführt wor´n. 2024 sall dat in disse Ort un Wies wiedergahn. De Plan licht all fast. Stattfinn' sall dat in'n September wedder in Rostock - unnerstützt von väle Sponsoren un Persönlichkeiten ut Sport, Wirtschaft, Politik un Kultur, natauläsen up de Website                        www.all-inklusiv-rostock.de  un ok in'n Flyer.

Uns Verein kann un will sik ok beteiligen. Dor käm ok de Diskussionsbidrag von Christine Stübe torecht, de all vör Johren in Tosammenarbeit mit dat Literaturhus mit Kinner unner Anleitung von een Rapper wat passendes inöwt hett. Sowat künn' got passen, wier Schenks Meinung.

Text: Thomas C. von Widdern

Fotos: Eva Dittberner

Zurück