WIR LIEBEN COOKIES
Vereinsnahmeddag in de Trotzenburg
Forsthausbrauerei Trotzenburg, Tiergartenallee 6 18059 Rostock
Vereinsnahmeddag mit Wolfgang Mahnke
Wolfgang hett ut sien nieget Bauk „Dei plattdütsche Urlaub“ läst un uns ´nen schönen ünnerhollsamen Nahmeddag bereit´t. De Veranstaltung wier gaut besöcht un all wieren sihr niegelich, denn wenn Wolfgang läst, denn ward dat ümmer interessant. Dat güng gliek los mit „Schneimann bugen in Coronatieden“ Dor hett doch jedein wat tau mäkeln hatt. Dei Aprilscherz mit dei Nadelböm wier orrig tau´n Hoegen. Dat up dei Kierls bi manche Såken kein Verlat is, hett de Frugens tau´n Smüstern bröcht. De Såk mit den´n Eifeltorm un den´n Computer an´n Handgelenk wier ok interessant.
Dat geef oewer nich blot Geschichten tau´n Hoegen, nee ok iernste, de in de hütige Tiet passen un tau´n Nahdenken anstötten, so as „Quo Vadis, Homo?“ De Veranstaltung wier gaut besöcht un all hürten nipping tau. Fix güng de Tiet vörbi un wi freuen uns all up den Bäukerdag, wur Wolfgang wedder dorbi is.
Wecker dat Bauk köfft hett, ward dat kum ut de Hänn´ leggen. So is mi dat gah´n. Gefoll´n hett mi ok de Geschicht „Dei Plattdütsche Urlaub“, wurna dat Bauk nömt wier.
Wenn man dei Lüd up disse beschräbene Oort för uns schönet Plattdütsch begeistern kann, dat wier ´ne gaude Såk.
De Nahmeddag güng komodig tau Enn´ un wi bedanken uns hartlich bi Wolfgang Mahnke för de vördragenen Geschichten un Riemels.
Text: Eva Dittberner
Fotos: Hartmut Christoph und Eva Dittberner
Wolfgang Mahnke läst ut sien nieget Bauk
"Dei plattdütsche Urlaub"
