WIR LIEBEN COOKIES
Wi fieern Fasching in de Trotzenburg
Forsthausbrauerei Trotzenburg, Tiergartenallee 6 18059 Rostock
Twei Johr hemm´ wi keinen Fasching dörchführ´n künnt. Dat hett uns “CORONA” vermasselt. Nu hett de Vörstand beschlaten, dat dat wedder Fasching in de Trotzen-burg gifft. Uns wier oewer nich klor, ob wi väl Vereinsmaaten dormit begeistern künn-ten. As ick kort vör Klock vier in de Gaststuw´ keem, wier ick platt. In de Gaststuw´ seeten väle faschingsfreudige Maatinnen un Maaten in bunte Kledasch un wieren all düchtig bi´t Klönen. Na de fründlichen Begrüßungen, mal wedder mit Handschlag un Ümarmungen eröffnete uns Vörsitter mit ´ner orrigen Büttenräd de Faschingsveran-staltung. Uns Vereinsmaat Nic Nenov harr all sienen Platz hinner dat Keyboard innahmen. Dat geef ´nen “Tusch” un de Danzdäl wier friegäben. Wecker nich gliek danzte, hett düchtig mitsungen un schunkelt, denn Nico hett sick väl schöne Musik infoll´n laten un sick orrig vörbereit´t.Mit väl Fantasie hemm´ sick de Maaten verkleed´t. Dor wieren, Clown´s, Harlekins, fiene Dam´s, Seelüüd, ein Gendarm, Dirndel, Kierls mit Prük, Hans im Glück, Rot-Krüz-Helper un ein Motorradbiker. Na so lang Tiet ah´n Fasching hemm´ sick all wat infoll´n laten. Dat wier so ein schöner Nahmed-dag. Äten un Drinken wür ok noch bestellt un väl vertellt un lacht. So ein hartlichet Miteinanner wier dat lang nich mihr. Keinein wull den Anfang maken, üm na Hus tau gah´n.
Buten wier dat all düster un dat rägente. De Vereinsmaatinnen un Vereinsmaaten sünd denn doch so langsam upstah´n un verafschiedeten sick. Sei bedankten sick för den schönen Nahmeddag un ein besonnerer Dank güng an Nic Nenov för de unermüdliche Ünnerhollung up sien Keyboard.
Text: Eva Dittberner
Fotos: Hartmut Christoph und Eva Dittberner
