Vereinsnahmeddag an´n 29.09.2022

Na unsen Vereinsutfluch an´n 16. Harwstmaand hemm´ wi uns ok all tau ´nen Vereins-nahmeddag in de Trotzenburg drapen. Dor wier dat orrig kommodig. Ierst wür ein bäten vertellt, wat wi noch bet Johresenn´ maken wull´n un denn keem ein besonnerer Bisäuk.

Wi hemm´ uns Fru Prof. Dr. Gudrun Eggers von´n „Verein zur Förderung Krebskranker Kinder Rostock e.V.“ inlad´t. Johr för Johr spenn´ten  unse Maaten un Frünn´ för dissen Verein up ünnerscheidliche Veranstaltungen Geld. Oewergäben wür dat denn blot von 2-3 Vereinsmaaten. Up unsen letzten Grillnahmeddag meld´ten sick ok wiedere Maatinnen un Maaten, de ok giern eins bi de Oewergaw dorbi sien wullten.

Fru Prof. Dr. Eggers wier bereit, tau uns Veranstaltung tau kamen un ok wat oewer ehren Verein tau vertell´n. Dat wier sihr interessant. Sei vertellte von den´n Bu von dat Gebäud un de Utgestaltung för de Ümgäbung, dat dat väl Maless gäwen un väl Geld un Nerven kost´t hett. Hüt is dat Öllern-Kind-Hus ´ne orrig Heimstäd´t för Öllern, de ehre kranken Kinnings besäuken un sei könn´ ok de Swestern un Bräuder mitbringen un ein poor Daag tausamen sien. Dat ganze Hus is fründlich un leiwfull inricht´t. Dat dortaugehürige Vereinshus is de Middelpunkt för Veranstaltungen, Frietiet un Tausamensien. Dat gifft ok ´nen schönen Spälplatz, eine Erhollungseck un ´nen Grillplatz. Allet is ümgäben von väl Gräuns un mit leiwfull plägte Böm un Blaumen.

Wi harr´n 500,00 € tausamenkrägen un hemm´ dat Geld an Fru Prof. Dr. Eggers oewergäben. Sei hett sick sihr freut un unse Maaten inlad´t, sick dat allet mal antauseih´n. Eva oewergifft de Spenn´ in´n Nam´ von unse Vereinsmaatinnen, Maaten un Frünn´ an Fru Prof. Dr. Eggers. Wi warden ok wiererhen  Spenn´ insammeln un den „Verein zur Förde-rung Krebskranker Kinder“ ünnerstütten. Nahdem uns Gast sick veraffschied´t harr, makten wi mit unse Veranstaltung wierer.

Christa Winkelmann läste ´ne sülwst verfat´te Geschicht oewer dat Hartpuckern vör, de sihr gaut ankeem un unse Plattsnackergrupp: Jürgen Wittmüß, Anke Moll un Hans-Jürgen Schulze bröchten noch ein lütt Programm mit Musik, Gesang un Rezitationen.

Dat wier ein sihr interessanter Vereinsnahmeddag mit ein kommodiget Enn´. Wi hemm´ noch´n bäten wat äten un drunken un makten uns denn up den Heimweg.

Text: Eva Dittberner

Fotos:  Renate Anders un Hermann Peters