Baukpräsentation an´n 27. September 2018

Mit Musik ümrahmt von unsen woll to liedenen Hans-Jürgen Schulze hebben dree Autoren Böker vörstellt:

 Wilhelm Münchow:

• „Mien leiw Rostock – Plattdeutsche Gedichte in und um Rostock im Frühling und Sommer“, Wilhelm Münchow, erschienen im BS Verlag
• „Mien leiw Meckelborg – Plattdeutsche Gedichte aus Mecklenburg im Herbst und Winter“, Wilhelm Münchow, erschienen im BS Verlag.

 Gerda Strehlow:

• „Schorler – Ein Rostocker Roman“, Hanns Rainer Perten und Gerda Strehlow, erschienen im Verlag Redieck und Schade
• „Coole Abenteuer aus acht Jahrhunderten. Laura und Niclas erkunden Rostock“, Gerda Strehlow, erschienen im Verlag Redieck und Schade

 Thomas C.v.Widdern:         

• „Nah Hus“ , Max Dreyer mit Vorwort von uns' Vereinsfründ Pastor Dr. Willi Passig, erschienen im Verlag Edition Pommern
• „Der Rostocker Greif in seiner Vielfalt“ mit Fotos von Hermann Peters und Texten von Dr. Hartmut Schmied und Thomas C.v.Widdern, Eigenverlag tcvw
• „800 Jahre Rostock – Elf historische Rundgänge zum Stadtjubiläum“, Klaus Armbröster, Joachim Lehmann, Thomas C. v.Widdern, erschienen im Hinstorff Verlag

 Wecker nich to den Vereinsabend kummen künnt, kann sick öwer ok noch bi de dree Autoren orrer bi Eva Dittberner informieren.

                                                                                     Text: tcvw

De Veranstaltung wier gaut besöcht. Ok unse niege Vereinsmaaten sünd kamen. Eva hett den Vereinsabend leit´t, dor Vörsitter un Verträterin ok mal wat anneres vör harr´n. Hans-Jürgen stimmte uns mit schöner Musik up de Veranstaltung in.

Wilhelm Münchow läste as Ierster ut siene Bäuker, de hei tau Ihren tau de 800-Johrfieer von uns Heimatstadt Rostock schräben hett. Mal ganz anners hürte sick ok dat Gespräch mit Mudder un Dochter in ostpreußisch an. Dat hett hei sihr gaut roewerbröcht. Wilhelm läste Riemels von de Harwstsünn, von de Aust un von de Läbenstiet un välet mihr. Bevör denn Gerda Strehlow läst hett, geef dat wedder Musik von un mit Hans-Jürgen.

 Gerda vertellte uns ut beide Bäuker  un stellte den Tausamenhang her. De beiden Kinner Niclas un Laura erkunnen Rostock. Mit ehr "Pad" können sei in verlädene Tieden reisen. Dat wieren sihr abendüerliche Biläwnisse. Sei erläwten sogor  mit Schorler de Stormflut. Schorler notierte alls för de Rostocker Chronik. Hei kämpte üm dat Läben von siene Fru Gret, de sihr krank wier. Ut grote Leiw´ tau ehr, geef hei ein Gelübde af, all de Rostocker Gebäud tau teiknen. Dat hett hei denn ok makt un sien Fru bleef an´t Läben. Wenn Ji mihr tau weiten kriegen wullt, de Bäuker gifft dat tau köpen.

Thomas stellte nu dat Bauk "Nah Hus" von Max Dreyer vör. Ein Spruch hett mi gefoll´n:

"Ick spräk de Spraak, de as Jung upe Straat ick spröek.

Bün´n Rostocker Jung mit ´ne Rostocker Tung, un mien Jugend is, wat ick söök."

Dat Heft "Rostocker Greif" wiest oewer 100 Motive von dat Rostocker Wappendiert, de all von uns´n Vereinsmaat Hermann Peters fotografiert worden sünd.

Dat Bauk "800 Jahre Rostock" bericht´t oewer 11 historische Rundgäng tau´n Stadtjubiläum. Väle von uns Maaten sünd dor jedet Johr mitgah´n un dat hett väl tau seih´n gäben.

Hermann Peters stellte ok sienen niegen Kalenner för  2019 mit väle Rostocker Biller vör. De is säker gaut för ein  Geschenk tau Wihnachten.

Marco un Hans-Jürgen hemm´ noch tausamen sungen un Dorit Schröder bröchte tau´n Afschluß dat Riemel "Die Lorelei" up Platt. Dat wier ein gelungener Vereinsabend. Välen Dank an all, de dortau bidragen hemm´.

Text: Eva Dittberner,  Fotos: Hermann Peters un Hartmut Christoph