Vereinsnahmeddag in de Trotzenburg

Forsthausbrauerei Trotzenburg, Tiergartenallee 6 18059 Rostock

Trüchblick up unsen Vereinsnahmeddag an´n 26. April 2018

An´n Dunnersdag, den 26. April hemm´ wi an den 35. Dodesdag von Kurt Dunkelmann dacht. Em tau Ihren makten wi ´ne Gedenkveranstaltung un lad´ten uns ok Lüüd von de Neptunwarft in, de em kennten un mit em arbeit´t hemm´. Thomas C. v. Widdern un Jürgen Wittmüß harr´n sick gaut vörbereit´t. Dat geef ein Lichtbildvördrag oewer dat Läben un Warken von Dunkelmann un ´ne Läsung ut dat Bauk "Bootsmann Schmidt".

Dat wier sihr interessant un sihr gaut von Jürgen un Thomas vördragen wor´n. Väle Vereinsmaaten un Gäst wieren kamen un hürten nipping tau. Twüschendörch süng Hans-Jürgen Schulze ein poor Leeder un spälte dorbi up siene Gitarr´. Wi harr´n sogor Gäst von´n Plattdütsch-Verein ut Stralsund, de sick mal bi uns ümkieken un Erfohrungen sammeln wullten. Kurt Dunkelmann is an´n 03. November 1906 in Crivitz bur´n un an´n 27. April 1983 in Rostock storben. Hei wier Generaldirekter von de Rostocker Neptunwarft un ok as Schauspäler, Künstler un Schriewersmann tätig. Hei wier mit de Schauspälerin Erika Dunkelmann (geb. Allwart) verheurat´t un harr mit ehr 5 Kinner.

Hartwig Jäger von´n Seniorenverein Neptun e.V. hett ok noch ´nen interessanten Bidrag leist´t un von Kurt Dunkelmann as Warftdirekter vertellt. - Kurt Dunkelmann hett dorup bestah´n, dat dat niege Schipp "SASSNITZ", wat grad in´n Bu wier, twei Schostein kriegen süll, genau so as de "WARNEMÜNN", dormit disse Schäpen von annere Fährschipp tau ünnerscheiden sünd. De verantwurtlichen Ingenieure hemm´ ehren Plan ännern müßt.

Fotos: Hartmut Christoph un Hermann Peters

Zurück