Vereinsabend

OZ-Medienhaus, Richard-Wagner-Str. 1A 18055 Rostock

Dat wier ´ne Veranstaltung tau´n 110. Geburtsdag von Kurt Dunkelmann.

Kurt Dunkelmann is an´n 03.11.1906 in Crivitz gebur´n un an´n 27.04.1983 in Rostock storben. Rostock un de Neptun-Warft hemm´ em sihr väl tau verdanken.
Inlad´t wieren ok de Senioren von de Neptun-Warft. De Saal von dat OZ-Medienhus wier rappelvull. Väle Maaten, Senioren von de Warft un ok Gäst, de dat in de Zeitung lästen, hemm´ sick för disse Veranstaltung interessiert. Wi müßten ümmer wedder Stäuhl dortau halen. Uwe Süssmilch un Thomas C. von Widdern hemm´ sick düchtig vörbereit´t. Sei lästen ´nen Utschnitt ut de Geschicht von´n Bootsmann Schmidt. Dat wier sihr interessant un man mücht doroewer mihr erfohr´n. Dat Bauk von Kurt Dunkelmann heit: "De letzte un de ierste Tiet" un wier von´n Hinstorff Verlag rutgäben.
Hans-Jürgen Schulze makte twüschendörch Musik mit siene Gitarr un up sien´n Snutenhobel. Dat keem gaut an, wieldat de Texte ok passig tau Rostock un de See wier´n.
Wiererhen geef dat Biller ut dat Läben von Kurt Dunkelmann un Filmutschnitte. All´s wier gaut tausamendragen wor´n.
Ümmer wedder keem tau´n Utdruck, dat dörch Kurt Dunkelmann de Warft prägt wier. Hei wier ein exelenter Techniker un ein Minsch, de tauhüren künn´. Oewer hei wier ok streng, wenn dat üm de Arbeit güng.

Harry Jäger, de Vörsitter von den Seniorenverein Neptun zeigte ´ne Billershow oewer Kurt Dunkelmann as Warftdirekter, so wie hei em erläwte. Väl geef dat tau vertell´n. Ok Gerhard Schmeling, de Maschinenbauer un Bereichsleiter in de Neptun-Warft wier un Dunkelmann as Warftdirekter erläwte, hett uns väl oewer de Tausamenarbeit vertellt. Ümmer wedder sünd em Episoden ut disse Tiet infoll´n.
Dor sünd ok noch annere Gäst upstah´n un vertellten oewer Dunkelmann un de Arbeit in de Warft.
Dat wier rundüm ´ne gelungene Veranstaltung. Danke seggen wi an Uwe Süssmilch, Thomas C. von Widdern un an de Senioren von de Neptun-Warft.

Thema: 110. Geburtsdag von Kurt Dunkelmann
Programmgestaltung: De Klönsnacker un Senioren von de Neptun-Werft

Zurück