Vereinsabend

OZ-Medienhaus, Richard-Wagner-Str. 1A 18055 Rostock

Vereinsabend mit Wolfgang Mahnke

An´n Dunnersdag, den 28. Sept. wier Wolfgang Mahnke bi unsen Vereinsabend in dat OZ-Medienhus. Dorup har´n wi uns all lang freut. Hei stellte sien nieget Bauk vör:

„Wenn bi Storm noch fischt würd...”

Dat wier ein schöner Abend. Siene Ort tau läsen hett uns Spaß makt. Dat güng würklich üm iernsthaftige Beläwnisse, de hei aewer mit fiensinnig Humor vördragen hett. De Tiet vergüng as in´n Flug. Väle Geschichten ut sien Bauk hett hei uns vörläst.

Dat wieren: „Prolog”, „Orkan”, „Heinrich Heine un dei vier Manöver”, „Hieven Sie bitte!”, „Dei Äquatordöp”, „Dei Steertparad”, „I am not büst besapen” un „So güng´t tau End orrer: afwickelt”. Dat wier musingstill in´n Saal.

Wolfgang Mahnke vertellt, wie hei  as Expeditionsleiter up dat Fischerieforschungsschipp „Ernst Haeckel” führt wier. Väle Biläwnisse un Abendüer hett hei bi siene wissenschaftliche Arbeit up de Seereisen hat un hei hett gaude un ok gräsig Minschen up siene Reis kennenlihrt.

Hei seggt:

„Ick heff denn´gröttsten Deil von dat Up un Dal in dei DDR-Hochseefischerie beläwt. Dat makt ein´n stolt, wenn ´n seggen kann: Ick wier mit bi! Mi sünd dei Knoewel bi dei Iesfischerie in dei Arktis blag froren. Unner dei afrikansch Sünn is mi dei Schweit denn´Puckel dalrönnt. Dat wiern suer Stunn an Burd, oewer ok schöne, unverglieklich schöne, dei ick nie nich vergäten ward.”

Leiw´ Wolfgang, wi bedanken uns hartlich för de unnerhollsame Stunn´ un wünschen Di beste Gesundheit, allet Gaude för de Taukunft un Ideen för wiedere schöne Geschichten.

Fotos: Hermann Peters und Hartmut Christoph

 

 

 

Zurück