WIR LIEBEN COOKIES
Treff in´n EIZ "Sprachcafé" mit Christine
EIZ Rostock, Haus Europa, Mühlenstraße 9 18055 Rostock
Ein Nahmeddag mit de “Klönsnackrunn” in’t EIZ “Sprachcafé”
Ik bün bannig niegelich up dat Sprachcafé mit Christine. Ik heff ehr ja all mit de Klönsnackers in’t Buernhus beläwt un wull nu weiten, woans so ein Nahmeddag in’t EIZ is. An’n 16.11.22 wier dat sowiet. De ierst’ Rutfödderung wier för mi, dat Sprachcafé œwerhaupt tau finnen. Wat heff ik mi dœsig anstellt! Ik bün ierst hentau kamen as de Runn bi Kaffee un Kauken all an’t Läsen un Rezitieren wier. Ik sett´e mi sinnig middenmank un hürte tau, von wat sei räden. Sei schnackten jüstemang von dat olle Rostocker Theoter. ‘Ne Ansichtskoort ut disse Tiet makte de Runn. Wo schön dat Theoter wier! Wenn doch ‘n nieget wedder bugt wür! Ob wi dat noch beläben? Dat blifft œwer nich dat einzige Thema hüt Nahmeddag. Reihüm würd vörläst un vördragen. Twischendörch wür’n ok Leeder sungen. Jens spälte up siene Quetschkommod un wie süngen all mit. Dei einen harr’n den Text dorbi, de annern süngen na ehr Pläsier. Ik harr Dusel. Miene nette Nawersch tau de linke Siet harr dat Textbauk upslagen un ik dörfte mit rinkieken. Mien Nawer tau de rechte Siet wier textsäker ahn Bauk. Hei vertellte uns, up’t fienste Platt, ok noch ‘ne Geschicht von siene Schaultiet as hei den Dativ un den Akkusativ lihren müste. Wat för ‘n Maless för einen, för den Hochdütsch ‘ne Frömdsprak wier.
Bevör wie uns verafscheeden un na Hus güngen, würd dat “Ostseeleed” sungen, ut vulle Kähl, ein jedein, as hei dat künn. Christine hett in’t EIZ ´ne nette Klönsnackrunn upbugt. Kamt doch eins vörbi un œwertügt Juch sülben. Ji ward dat EIZ all finnen, orrer Ji fragt mi na den Weg
Text un Fotos: Gerlinde John
