Stadtrunngang mit Deilnähmer von´n EIZ

An‘n13.Juli hett sick de Klön-snackrunn von’t EIZ nahmed-dags Klock half drei tau ´nen Altstadtrunngang drapen. As ümmer, wür blot Platt snackt. Dat wier bannig warm an den´n Dag, äwer wi güngen sachtens los, an de Grubenstraat lang. As ierstes blieben wi vör de olle Bäckerie – Grubenbäcker, gründ‘t 1899, stahn. Ein lütt Snack mit den´n Bäckermeister künn äwer nich stattfin‘n, hei wier verhinnert, schad! Wierer güng dat tau de HMT. Up denn Weg dorhen vertellten de Deilnähmers, de dor einst in de Gägend wahnt hemm´, wat sick dor so vör 50/60 Johr an‘n Läben afspält har. Bi de HMT ward oewer de gauden Veranstaltungen un de Bedüdung snackt un jedein wüsst wat tau vertell´n. Denn güng dat in de Petrikark. Vörher würd noch ein Foto von all  Deilnähmer makt. Ok hier ward väl öwer de Geschicht von ´ne Kark vertellt. Tau´n Schluss spälte Hans-Jürgen Schulze in ´ne Kark ein Leed up siene Mundharmonika.

As wi wedder buten wiern, hemm´ de Frugens von´ne Grupp Nuurdwind, de sick bereit erklärt harr´n, dor mittaumaken, noch ein poor plattdütsche Leeder sungen. Dorför an disse Stell ein grotet Dankeschööön!  Up den´n Weg trüch tau´n EIZ wür noch eins Halt makt bi de Nikolaikark. Hier hemm´ denn all mit de Nuurdwindfrugens noch eins kräftig mitsungen. Jürgen un ick gäben dornah noch ein poor Läuschen un Riemels tau´n Besten.

In’n EIZ hemm wi wedder bäten Kraft schöpft, ´nen lütten Umdrunk nahmen un uns all verafschied´t. De Vörsitter hett sick freut un sick för de gaude Idee un Dörchführung bedankt. Dat hett mi denn wedder freut. All wier´n sick einig, dat dat ein kommodiger Nahmeddag un eine gaude Premiere för disse Ort Klönsnackrunn wier.

Bet tau´n nächsten Mal.

Juch Christine Stübe.