60. Toitenwinkler Kloensnack

Eine ganz dulle Veranstaltung mit „utverköftet Hus“ wier de 60. Toitenwinkler Klönsnack an´n 08.06. an de „Alten Schmiede“.Besonnere Höchtpunkte wieren de Deilnahme un de Uptritt von uns Uwe Süssmilch as Mitbegrünner von de Veranstaltungsreihg un von Jörg Bitter, de för dat Jubiläum ein eigen Riemel makt hett.

Vör 15 Johren güng dat los. Bet up de CORONA-Tieden wür de vierteljöhrige Rhythmus dörchholl´n un de twei Stunn´ vergüngen ümmer as in´n Flug. Dat is de schöne Mix ut plattdütsche Riemels, Musik tau´n Mitsingen un Infos ut den´n Stadtdeil. Ok de kommodige Atmosphär in de “Alten Schmiede” gehürt dortau. Sei hett dortau führt, dat sick ein faster Stamm von Tauhürern un Mitsnackern rutbild´t hett. Bi de iersten Veranstaltungen sorgten Uwe un Jens för gaude Stimmung un ´n lütt bäten later keem denn Jörg dortau. Välen Dank an disse Drei för de gaude Tausamenarbeit.

Dat hebben wi gaut makt, Jungs!                                               Juch Jens Anders

Wi grateliern tau´n 60. Toitenwinkler Klönsnack - Riemel von Jörg Bitter

Buten is Juni un Sünnenschien,

De Toitenwinkler Klönsnack makt sick fien.

Uns Plattdütsche seggen, und dat is wohr,

Hüt fieern wi em dat 60. Mal.

 - Den hemm´ mal eins Jens un Uw´

in´t Läben raupen in ehr gaut Stuw´.

De „Alte Schmiede“ wier bekannt

in´n Hölderlin Weg un in´t wiedere Land.

 - Dat hett sick rümspraken in de Runn´,

väle niege Plattspräker hemm´ sick funn´.

Fixing kamen sei tau´n Kaffe-Klatsch,

hürten nipping tau, dat is doch wat!

 -Väle Lüüd wieren ümmer dor

mit Riemels un Läuschen all de Johr.

Ok Kinnings kamen mit Uptritte an

un hemm´ Hoeg bröcht för Jedermann.

 - Jens harr ümmer de Treckfiedel dorbi

un spälte plattdütsche Leeder mit väl Plie.

All´ hemm´ sei sungen, so güng dat „Juchhei“

un wier´n mit väl Kraasch väle Johre dabei.

 - Ick wünsch Gesundheit, makt wierer so,

de plattdütsch Leeder maken uns froh,

Up den Toitenwinkler Klönsnack ein “Hoch”,

den wull´n de Plattdütschen ümmer noch.

        Jörg Bitter