Sommerafscheed

"Kurt-Dunkelmann-Stuw" (Neptuntreff der BG Neptun), Helsinkier Str. 38 18107 Rostock

De Plattsnacker in de K-D-Stuw´

Ditmal hemm´ de Plattsnacker de Gäst ünnerholl´n. Ein schönet Programm makten Jürgen Wittmüß, Karin Möller, Eva Dittberner un  Klaus Decker mit siene Treckfiedel. De Stuw´ wier gaut besöcht un de Plattsnacker halten ümmer wedder niege Riemels, Geschichten un Schwänke ut de Muskist vör. Dorbi wier wat tau´n Hoegen un ok tau´n Nadenken.

Klaus Decker makte düchdig Musik un all süngen mit. Ob Seemannsleeder, Volks-leeder orrer plattdütsche Leeder. Dat makte orrig Spaß. Man möt staunen, wat för gesangsfreudig un stimmgewaltig Gäst wi hat hemm´.

Väle Riemels un Geschichten wier´n von Rudolf Tarnow. Hei ward ümmer wedder giern hürt. De sünd licht tau verstahn un dat gifft wat tau´n Smüstern. Aewer ok Riemels von annere Schriewerslüd sünd vördragen wor´n.

Karin bröchte ein Riemel von Lore Lewandowski, "Wat ick leiw´". Dat wier von Kurt Kaiser in dat Plattdütsche oewersett. Eva hett dat Gedicht "Nimm di Tiet" von ehre Swester tau Gehür bröcht. Dortwischen geef dat ümmer wedder Musik mit Klaus.

In gaude Form wier ok uns Vörsitter Jürgen Wittmüß, de siene utsöchten plattdütschen Saken mit Plie un Pläsier roewerbröchte.  Dat geef väl Bifall un ok Blaumen. Välen Dank an all, de mitmakt hemm´ un an de, de disse Veranstaltung mit Kauken un gauder Vörbereitung ünnerstütt´ten. 

Fotos: Holger Ahrens, Eckhard Maibauer und Eva Dittberner

Zurück