Plattdütscher Nahmeddag in´t Buernhus Biestow

As niege Vereinsmaatin wull ik dat Vereinsläben kennenlihren. Un wur künnt ik dat wull bäder as wenn ik tau de Veranstaltungen hengahn dau. Also fix dat Maandenbladd upslagen un all de Termine von Siet 3 in mienen Kalenner œwerdragen. Oha, dor heff ik mi ja väl vörnahmen. Nu mö´k anfangen tau planen, dormit ik dat allens in´ne Reih kriech mit miene annern Verafrädungen. Wecker dat eine wull, möt dat annere mœgen... Ik wull Juch ümmer mål wat berichten, wat ik dor so beläwt heff.

De Plattdütsche Nahmeddag mit “De Klönsnacker” in’t Buernhus

An’ 5. November, ein´n Sünnabend mak ik mi nahmeddags up’n Weg na Biestow. Dat Wäder is so schön, de Häwen is blag, de Sünn schient. Ein wunnerschöner Harwstdag. Ik sett mi up mien’ Drahtäsel un radel tau’t Buernhus. Christine, Ellen un Jens sünd all dor. Sei sünd hüt “De Klönsnacker”.

Poor Gäst sünd ok all dor. Leider blieben poor Stäuhl frie. Dat schöne Wäder lockt de Lüüd woll ierer na buten as in´ne Gaststuw. Dat deit de Stimmung œwer nich schaden. As wi denn all versorgt wier´n mit Kaffee un Kauken, güng dat Programm ok los. Väl dreihte sick üm, wän wunnert´s, den Harwst un all’t wat wi in disse Tiet so daun un laten orrer leiw hemm’. Geschichten œwer unsen Olldag, vördragen mit väl Humor. Ellen läst von ein’ Rundgang dörch de KTV. De makt mi so niegelich, dat ik den Spaziergang an ein’ Dunnersdach mit apen Oogen up jeden Fall maken möt, wenn Wochenmarkt is. Dor köp ik mi n’ Mäkelborger Ananas un kak mi ´ne schöne Supp. Wi hemm’ so väl hürt œwer uns gaude Mäkelborger Koek, dat ik gliek Hunger kreech. Twischendörch gifft’t ümmer mal ‘n Leed tau´n Mitsing’n. De Texte möt ik noch ‘n bäten äuwen. Schietegal, hüt sing ik äben dreimal de ierste Stroph. De Tiet vergüng bannig fix. Danke leiwe Klönsnacker. Ik kam wedder.

Juch Gerlinde John

Text und Fotos:

Gerlinde John