Plattdütsche Läsung mit Wilhelm Münchow

Dein Musik-Wohnzimmer, Barnstorfer Weg 37 18057 Rostock

An´n Middwoch, den 09. Oktober hett Wilhelm Münchow wedder in „Dein Musik-Wohnzimmer” ut siene Bäuker vörläst. De Gäst seeten all vuller Erwartung bi Kaffe un Kauken up siene Läuschen un Riemels. Schöne Geschichten hett hei vördragen mit väl Humor un Pli. Düchdig hemm´ sei lacht, wenn Wilhelm mal  ostpreußig sprök. Mal oewer den Tellerrand kieken gehürt je ok dortau. Twüschendörch spälte George  wunnerbor up dat Klavier. Man kreech orrig Lust tau´n Danzen. Wilhelm harr wat vör hat un mi bäden, ein poor Biller tau maken. Ick wier sihr niegelich.

Hei halte nu Fru Heike Löffler, de Inhaberin von de Stuw´, na vörn' un oewergeef ehr de Chronik „Geschichte und Geschichten aus 50 Jahren Lütten Klein”. Dat wier aewer nich all´s. Dortau keem ein Ümschlag mit 250,00€, de Fru Löffler för de Kinnings, mit de sei Bastel-kurse un Handschriewen as „Papiertante” makt, nähmen sall. Sei hett sick sihr freut. Dat Geld keem ut den Verköp von de Chroniken, de de Chronik-Grupp gägen dat Vergäten tausamenstellt harr. För disse Chronik is all de tweite Uplag makt wor´n. So beleiwt wier sei. Ok uns Wilhelm harr doran mitarbeit´t. De Erlös is ok an annere Vereine gahn, de haupt-sächlich mit Kinner un öllere Minschen arbeiten. Wat kann dat Schöneret gäben?

Dat wier ein schöner Nahmeddag mit ein gaudet Gefäuhl, för annere Minschen dor tau sien.

 

Text un Fotos:  Eva Dittberner

Zurück