Plattdütsch mit de Klönsnacker in´n Zoo

Zoologischer Garten Rostock gGmbH, Rennbahnallee 21 18059 Rostock

Maientiet makt dat Hart so wiet

Lang hemm´ wi na ´nen passig Termin för de Plattdütschrunn´ in´n Zoo söcht. Denn einigten wi uns all up den Himmelfohrtsdag an´n 10. Mai 2018.

De Warbedrummel würd´ düchdig rührt oewer Facebook, up de Websiet von´n Zoo un ok up Plakate. Ünner dat Motto: "Maientiet makt dat Hart so wiet, ein buntet Programm nich blot vör de Kierls" keem ein lustig Programm taustann´. De Klönsnacker Anke Moll, Jürgen Wittmüß, Uwe Süssmilch un uns Muskant Klaus Decker harr´n kiewig Riemels un flotte Musik instudiert un dormit ´nen fidelen Nahmeddag tau´n Hoegen vörseih´n. Aewer leider hemm´ blot ´n poor Gäst den Weg in dat Darwineum funnen. Väle Familien mit ehre Kinner wullten bi dat schöne Wärer leiwer buten bi de Dierte bliewen un dörch den Zoo schlennern. De Lüüd, de aewer den Weg in dat Kino von´t Darwineum funnen harr´n, hemm´ sick orrig hoecht un luthals mitsungen.

Uwe un Jürgen harr´n ehre Frugens dorbi un ick wier ok dor un heff dat nich beduert. Ein Sagwuurt seggt je: " So jung kamen wi nich wedder tausamen."

                                               Sigrid Malewschik

Bilder: Hermann Peters

Plattdütsch in´n Zoo Rostock, Kino Darwineum.

 

Zurück