Fieerliche Oewergaw´von plattdütsche Texte

In uns´ Septemberutgaw´ von´t Maandenbladd heff ick bericht´t, dat wi an´n 14.08.2018 tau Bisäuk in´t Kreisagrarmuseum Dörp Mäkelborg wieren. De Leiter von dat Museum, Björn Berg, hett uns fragt, ob wi tau de Utstellungsstücke ein poor Geschichten up Plattdütsch schrieben künnten. Wi hemm´ tauseggt. De Upraup an uns Vereinsmaaten is woll nich ankamen, denn mitmakt hemm´ blot Christa Winkelmann un Eva Dittberner. Mit in´t Boot halten wi uns denn noch Dr. Behrend Böckmann, de väl Erfohrungen ut de Landwirtschaft harr. Björn Berg hett de Geschichten mit Biller ut dat Museum verseih´n un dorut ein Heft makt, dat de Besäuker sick för den Runngang dörch dat Museum utleih´n orrer ok köpen künn´. Dat Heft kann ümmer wedder utbugt warden un wecker noch wat bistüern will, kann dat hartlich daun. Wenn dat in Hochdütsch is, denn oewersetten wi dat. Uwe Süssmilch hett sick nu ok all wat infoll´n laten. Björn Berg hett för de Vörstellung von dat Heft väle Gäst inlad´t. De Veranstaltungsplatz wier utlast´t.

Dat wier ´ne sihr schöne Veranstaltung. Dat geef Kaffe un frischen Kauken, de sihr gaut smeckte. Björn Berg begrüßte de Gäst un verklorte, wat hei mit disse Aktion erreiken wullt. De plattdütsche Sprak sall erholl´n  un ok an uns Kinner wierergäben warden. Wi stellten uns denn vör un uns Vörsitter, Jürgen Wittmüß, vertellte, wat uns Verein so makt, wurväl Maaten wi sünd un dat wi uns ok üm  de Kinnings in KITA´s un Schaulen kümmern.

Dorna dörften wi ut unse Texte vörläsen. Twischendörch geef dat Musik mit Peter Wendt. Ok annere plattdütsche Vereine un Krinks hemm´ sick vörstellt un ´nen lütten Bidrag bröcht. Wi wull´n nu wiererschrieben, dormit dat Heft noch dicker un interessanter ward.

Leiw´ Lüd, makt mit un geeft Juch Erinnerungen an olle Tieden pries. Besäukt ok mal dat Kreisagrarmuseum, dat lohnt sick.

                                                                                               Juch Eva

Text: Eva Dittberner

Fotos: Werner Brickmann