Dat is wat för de Kinnings wäst

De tweite Deil von unsen Bäukerdag wier dat plattdütsche Familienfest. Wi hemm´ je all ümmer wat för de Kinnings in dissen  Tausamenhang makt, aewer so as dit Johr wier dat nieg. De tweite Bühn wür för de Kinner un ehre Öllern, Grotöllern un Gäst besonners vörbereit´t. Hier geef dat ´ne Hüppenborg, väle interessante Stationen tau´n Spälen un tau´n Begriepen von de plattdütsche Sprak. Dat wür´n Kinnerbäuker präsentiert, de wi in´t Plattdütsche oewersett harr´n. Ein Töwerer hett de Kinner begeistert un sei orrig tau´n Smüstern bröcht. Höchtpunkte wieren de Uptritte von de Kinnings sülben. De Kinnings, de nu an de Reihg kämen, wieren all orrig hibbelig vör Uprägung. Jörg Bitter hett de  Kinner ut de Kita Seestern ut Toitenwinkel vörstellt.

Sei harr´n all düchdig Plattdütsch inäuwt. De Kinner ut de Grundschaul Nurdwindkinner, de mit Jürgen Wittmüß prauwt hemm´, süngen uns plattdütsche Leeder vör un wür´n dorbi von H.-Jürgen Schulze mit de Gitarr begleit´t. Johanna Bojarra wieste, wat de Kinnings ut de Kinnervilla Coords Gehlsdorf lihrt hemm´. Leider dörben wi ut Sicherheitsgrünn´ de Biller nich afdrucken. Dat Spältüchs wier wat för de Kinnings un sei hemm´ dorbi ok nahdenken müsst. De Töwerer künnt gor nich werrer uphüren. De Kinner wieren rein dull na em.

Interessant wir ok de Läsung von Kinnerbäuker mit Wolfgang Kniep un Anke Gohsmann. De von´n Christa Winkelmann, Eva Dittberner un von Wolfgang Kniep oewersetten Kinnerbäuker sünd von Anke un Wolfgang sihr schön präsentiert  worr´n. Ünnerstüttung geef dat von´n ß-Verlag, Herrn Jambor. 

Dat wier ein schöner Nahmeddag för de Kinnings un ok för de Öllern.

Fotos: Thomas C.v. Widdern un Jürgen Wittmüß