Plattdütsch-Autorendag 29.08.2021

Lang hemm´ wi up den Bäukerdag luert, de is aewer ümmer wedder wägen "Corona" utfoll´n. Nu einigten sick de Veranstalter up ´nen Autorendag an´n 29.08.2021. Dat heit , ahn Bedeiligung von de Verlage un ahn Bäukerverköp. Liekers freuten wi uns up de Läsungen von uns bekannte Autoren un up dat Platt-Puppentheater. Nu har´n wi aewer  ein Problem mit dat Wärer. Dat hett den ganzen Dag pladdert. Wägen de Hygienevör-schriften dörften wi nich in de Hall. De Tauhürers sünd likers kamen un spannten de Schirme up. De Autoren hemm´ sick väl Mäu gäben un schöne Riemels, Läuschen un Leeder vördragen, de mit orrig Bifall belohnt worden. Denn keem dat "Ernst-Heiter-Figurentheater" un de Kinner hemm´ sick bannig freut. Pünktlich tau de Tiet wieren de Öllern, Grotöllern mit ehre Lütten dor. "Frau Fischer und ihr Mann" hett dat Stück heiten un wür in "Missingsch" Platt un Hochdütsch vördragen. Dat wier ein grot Erfolg. Organisiert un dörchführt wür disser Dag wedder von´n Botanischenn Gorden, Frünnkreis Botanscher Gorden, von´n Heimatverband Mecklenburg-Vorpommern  un von unsen Plattdütsch-Verein. Väl Arbeit  hett  sick Werner Brinckmann werrer makt, üm dissen Dag tau veranstalten.

Moderiert hett uns Vörsitter Jürgen Wittmüß. Väle Maaten un Frünn´ hemm´ düchdig bi de Vörbereidung un Dörchführung hulpen un ok Kauken backt. Dorför seggen wi hartlichen Dank. Wi bedanken uns ok hartlich bi all de  Sponsoren, ahn´ de dat allet nich stattfinn´ künnt. Dat wieren de "Stiftung für Ehrenamt und bürgerschaftliches Engagement in MV”, „Firma Groth & Co” Bauunternehmung GmbH Rostock un de „Heimatverband Mecklenburg-Vorpommern” e.V.

Text: Eva Dittberner

Fotos: Hartmut Christoph, Hermann Peters und Eva Dittberner