Läsung in de K-D-Stuw´ mit Ellen, Eva un Eckhardt

Ditmal makten wi ganz wat Nieget. De Schriewers, de för dat Kreisagrarmuseum in Dorf Mecklenburg oewer de Utstellungsstücke schräben hemm´, sallten ehre Geschichten in de Kurt-Dunkelmann-Stuw´ vörläsen. Schräben hemm´ Christa Winkel-mann, Eva Dittberner, Franziska Blume, Eckhardt Maibauer un Wilhelm Münchow von unsen Verein. Unnerstüt´t hett uns dorbi ok Behrend Böckmann ut Kirch-Rosin. Dor Christa wat anners vör harr´ is Ellen Lange insprungen. De Stuw´ wier vull un all wieren niegelich. Hartmut Christoph wier mit sien Akkordeon dor un bröchte glieks tau Anfang all in Stimmung. Lustige Biläwnisse würden vörläst. Eva bericht´te von de Tüffelkäwers, de sei von den Nawersgorden afsammelte un in ehres Vadders Gorden utsett´te, wiel sei nich in´t Kino gahn dörfte un oewer de Geschicht mit dat Kiekschap Marke "Rubens". Ellen läste de Geschichten von Christa vör, de oewer de olle Neihmaschin, de Bodenreform un von den´n Mohnkauken, den de Russ "Kamerad von Sonne nömte" vertellten. Hei harr dacht, dat wier Mandkauken. Lustig güng dat wierer mit Eckhardt. Hei läste siene Geschicht oewer de Rott in´n Häuhnerstall un von´n störrichen Trecker, de von Franziska Blume schräben wier. Man möt staunen, wat sick för Talente bi unse Vereinsmaaten verstäken.   Väle annere Geschichten sünd noch tau´n Vörschien kamen un all lachten düchdig. Hartmut makte immer wedder twüschendörch Musik un de Lüüd süngen orrig mit.

Dat wier ein schöner Nahmeddag. Siggi  hett mit Karin un Elfi alls so schön vörbereit´t. Dat geef Kaffe un Kauken. De wier von Bärbel Wittmüß backt un schmeckte sihr gaut. Mit ´nen schönen Blaumenstruß bedankte sick Siggi bi uns Frugens un de Kierls hemm´ ´ne Buddel Wien krägen.

Hartlichen Dank an all, de mitmakt harr´n.

Fotos: Eckhardt Maibauer, Holger Ahrens und Eva Dittberner