WIR LIEBEN COOKIES
Läsung mit Gisela Reink
"Kurt-Dunkelmann-Stuw" (Neptuntreff der BG Neptun), Helsinkier Str. 38 18107 Rostock
Wedder wier dat de 3. Mandag in´n Maand un de Frünn von de plattdütsche Sprak hemm´ sick in de Kurt-Dunkelmann-Stuw´ drapen. Ditmal wier uns „Gisela Duo” nich vullstännig, denn bi Gisela Schwarz wier dat tau Tiet mit de Gesundheit nich so gaut. Sei künnt noch nich an de Läsung deilnähmen. Fründlicherwies wier Gisela Reink allein kamen, üm de Gäst tau ünnerhollen. De Stuw´ wier vull un all harr´n gaude Lun. Gisela drög mihrstendeils sülwst-schräbene Geschichten vör un vertellte sihr väl oewer unse Heimatstadt Rostock. Sei sprök oewer ehre Schaultiet un oewer de Maless, dat sei oewerwinnen müsste. Dat geef aewer ok Lihrers, de sei giern harr´. Väl tau fix vergüng dei Nahmeddag.
Tau´n Afschluß oewerraschten uns twei ganz junge Besäukerinnen mit ein plattdütschet Gedicht. Eckhardt Maibauer harr´ siene Enkelin un de Fründin von ehr mitbröcht un de wiesten uns, dat de plattdütsche Sprak nich ünnergeiht. Dat geef orrig Bifall un ein hartlichet Dankeschön. Ick mücht mi ok hartlich bi Elfi Schmidt bedanken, de mi ditmal düchdig hulpen hett, wat sünst ümmer Karin Möller makt.
Sigrid Malewschik
Fotos: Eckhardt Maibauer
