Wi wieren bi Reich & Rathmann

Ji weit je noch, wat „Klönsnack an´n Spinnrad” heit? Wi besäuken handwarkliche Betriebe un kieken uns an, wat dor anfarigt un wie dat makt ward. Dat is ümmer sihr interessant. Disse Veranstaltungsreih´ hett Ali Brinckmann mal in´t Läben raupen. Dorbi kann man ümmer wedder wat Nieget kennenlihren.

Ditmal wieren wi in´t Sanitätshus Reich & Rathmann. De Hauptsitz is in de Erich-Schlesinger-Straße 28. Herr Reich hett uns hartlich tau ´ne Besichtigung inlad´t. Na de Begrüßung hett uns Herr Reich dörch de Warkstätten führt. Dor geef dat väl Interessantet tau seih´n. Dor warden för de Patienten technische Hülpsmiddel na Maß anfarigt. Ein persönlichet Gespräch is ümmer de Vörutsettung, för ´ne genaue Bestandsupnahm` un för dat Vertrugen twüschen Patient un Sanitätshus. In de Warkstätten för Orthopädietechnik warden näben Prothesen, Orthesen, Bandagen, Korsetts, Rullstäuhl orrer Krankenbedden ok paßgenaue Schauh un Inlagen anfarigt. In jedeine Warkstatt ward flietig arbeit´t. Na de Führung un de interessanten Verklorungen von Herrn Reich hemm´ wi noch all tauhop ein bäten klönt un Kaffe drunken. Wi bedanken uns hartlich bi Herrn Reich un freuen uns up ´ne wiedere gaude Tausamenarbeit. Välet ward mit akkerate Handarbeit makt. Hier gifft dat olle un traditionelle Maschinen un ok ganz moderne, computergestüerte. Flietige Handwarkersünd hier an´t Arbeiten. Man markt, dat all mit Freu dorbi sünd. Dat ganze Ümfeld is fründlich mit väle Biller inricht´t.

Uwe hett disse interessante Besichtigung mit Herrn Reich organisiert un Heidrun Rother hett den Kauken tau´n sponserten Kaffe backt.

Hartlichen Dank an all´, de för de Vörbereitung un Dörchführung sorgt hemm´.

Text: Eva Dittberner

Fotos: Hartmut Christoph