Jörg Bitter un siene Plattdütschkinner

Rathaus, Neuer Markt 1 18055 Rostock

Stadtrunngang mit de Lütten

Jörg Bitter is Vörstandsmaat in unsen Verein un süht siene Upgåw in´t Plattdütschlihrn mit de Kinner in KITAS un Schaulen. Hei arbeid´t in de Grundschaul Ostseekinner, in de KITA DRK-Toitenwinkel, KITA Seestern, KITA Klaukschieter in Dierkow-Siedlung, in de KITA Fischbank 6 – Oldstadt un in de KITA an´n Gehlsdörper Äuwer. Manchmal hett hei twei bet 3 Gruppen an einen Dag. Dat is fast so as ´nen Sack Flöh häuden. Hei blifft aewer ruhig un verklort de Kinner ümmer wedder de Bedüdung von de Plattdütsch-Würd. Jörg geiht ok mit de Kinner dörch Rostock, wiest  sei ehre Stadt un vertellt Geschichten. De Rostocker Kennewarden hett Ille Frentz in ein schön Riemel bröcht un Jörg hett den Spruch ümmer wedderhalt. Mit de Stratenbahn führten sei bet tau´n Steindur, tau´n Rosengorden un tau de soeben Linnenböm. Denn güng`t an de Stadtmuer lang tau ehr „Lieblingsdur“ un hei wieste up dat Kauhdur. Se hoegten sick eis oewer den Namen un wieren up allens ganz dull niegelich. An´n Niegen Markt tellten sei de soeben Straten un up dat Rathus de soeben Törm. Bi de Marienkark künnten sei ok de söben Dören seihn un denn güng dat rin in de Kark. Sihr interessant wier de grote Astronomische Klock. Sowat harren sei noch nie nich seihn. Jörg wieste noch up de smucken Finster hen un de Kinnings wieren hen un weg vuller Begeisterung. 

Wierer güng dat an´n Zägenmarkt vörbi dörch de Oltstadt tau`n Mönkendur. Bi`n Spieker vörbi, de Grubenstrat lang. Bi`n Gerberbrauk keemen sei bi de Stratenbahn an un führten mit de Linie 1 wedder trüch. Dissen Stadtspaziergang makt Jörg ofteis mit de Kinner, de jedetmal vuller Begeisterung sünd. In´n Mai/Juni is ´ne Afschlutveranstaltung in de KITA Seestern. Dor warden de Kinner ok wat för ehre Öllern vördragen.

An´n 08. Juni 2024 is Bäukerdag in´n Botanischen Gorden. Dorför äuwt Jörg all ein lütt Programm mit de Kinnings in un wiest, was sei bether in Plattdütsch lihrt hemm´.

Leiw´ Jörg, dat makst Du wunnerbor un de Kinner freuen sick ümmer, wenn sei mit Di tausamen sünd. 

                                                      Danke un mak wierer so!

Text: Eva Dittberner

 

                                    

Zurück