Dat wier Plattdütsch pur

An’n 4. Juni hemm’ uns Verein, de Botanische Gorden un de Heimatverband MV inlad´t tau´n 9. Bäukerdag. De Bäukerdag is all ein fest Bestanddeil von de Plattdütsche Wochen, wecke all dat 3. Mål von den Heimatverband veranstaltet wur´n. De Schirmherrin dorvon is uns Ministerpräsidentin Manuela Schwesig. Man schad, dat sei nich sülben tau´n Bäukerdag kamen künn’t. Oewer uns Ministerin för Wissenschaft un Kultur, Bettina Martin, hett ehr würdig verträden. Uns nieg Vörsitter Jens Anders eröffnete den Bäukerdag, de Ministerin hett ´ne Räd hollen un ok Prof. Poremski, de Direktor von’n Botanischen Gorden, hett ‘n por nette Wür´ tau Begrüßung seggt.

So richtig tau Harten güng de plattdütsche Grußbotschaft von Fru Dr. Nenz von’n Heimatverband. Radio un N3 Fernsehen wir´n vör Urt un hemm' later bericht´t oewer de Veranstaltung. Uns Jürgen Wittmüß keem jå ganz grot in Szene- orrer bäder seggt sien T-Shirt mit den´n fründlichen Henwies “Snack platt mit mi” up de Bost. Dorför geef dat nauch Gelägenheit an’n Bäukerdag.

Höhepunkt wir ahn Twiefel de Bekanntmåkung von dat Plattdütsch Wuurt 2023: “Fräden”. De Jury wir sick einig as noch nie un dat gifft’ wull nich einen Plattsnacker, de nich taustimmen wür´. De Wunsch na Fräden up de ganze Ierd spägelt sick ok in dat best Plattdütsch Sechwuurt 2023 wedder: “Leiwer drög Brot in’n Fräden, as Kauken un Braden in Striet”. Un denn gifft dat jå ok noch den Pries för dat best niege Wuurt up Platt: “Brägenplietschmaschin” as Beteiknung för “Künstliche Intelligenz (KI)”. Hm, hüürt sick bäten frömd an. Hett de KI sick dat an’n Enn´ sülben utdacht ? Na, wi warden dat noch gewohr warden.

Mit den´n Unkel-Bräsig-Pries is dit Johr Fru Dr. Cornelia Nenz von’n Heimatverband MV ihrt wur´n för ehr Engagement för de Plattdütsch Språk. Wi gratulieren von Harten!

Na de Ihrungen güng dat up twei Bühnen Slag up Slag wierer mit dat Programm. Bi dat Kaiserwäder wir dat Interesse grot un hett väle Lüüd anlockt. Up de Bühn 1 hett uns Vereinsmaatin Eva dörch dat Programm führt.

Afwesselnd hemm' Autoren ut ehre platt-dütsch Bäuker läst un Kulturgruppen sünd upträd´t mit ehr plattdütsch Programm. Wi bedanken uns bi:

- De junge Singer/Songwriterin Annka Prosa mit ehr eigen Leeder up Platt  - De Klönsnacker ut unsen Verein

- Dat Duo Anke Gohsmann un Wolfgang Kniep

- De Autoren Dr. Behrend Böckmann, Jürgen Pump, Wolfgang Mahnke, Norbert  Schröder

- De Folkloregrupp Nuurdwind- De Elmenhorster Landlüüd  - Leif Tennemann för siene ünnerhollsame Improvisation up Hochdütsch.

Danke leiw´ Eva. Dat hett allens wunnerbor klappt. Dank ok an Bernd Andres, de för den gauden Ton tauständig wäst is.

Up de Bühn 2 hemm' de Kinner dat Programm makt. Na, nich ganz allein. Tauierst würd´ dor ok läst. Heidelore Rumler hett ut ehr Kinnerbäuker läst un mit ehr Handpop-pen dortau spält. So künn’t ok manch ein verstahn, wurüm dat geiht, de nich platt snackt. Välen Dank an Fru Heidelore Rumler.

Denn wier´n de Kinner an de Reihg. Jörg Bitter wier mit de Kita Kinner ut Dierkow un de Grundschäuler ut Toitenwinkel dorbi. Jörg harr mit de Kinner ein richtig schönet Programm instudiert. Ach, wat wier´n de Lütten upgerägt! Hett oewer allens gaut klappt un sei kreegen väl Bifall. Välen Dank an Jörg un “siene” Kinner un an de Lihrer un Erzieher de dat möglich måkt hemm'.

De Schäuler ut de Grundschaul Groß Klein hemm' “De Fischer un sien Fru” upführt. Jürgen Wittmüß un de Lihrerin hemm' dat mit de Kinner all lang Tiet vörher inäuwt. De Uprägung wier grot, oewer de Mäuh hett sick lohnt. Mit´n bäten Hülp hemm' de Kinnings dat Stück gaut spält un hemm' sülben väl Spaß dorbi hatt. Tau’n Enn´ geef´t ok hier väl Bifall.

As Letzt geef’t Poppentheater mit dat Stück “Der Ratzenspatz” up Hochdütsch. Schöne Geschicht von Fründschaft un Hülpsbereitschaft. Kinner, Öllern un Grotöllern hett dat väl Spaß makt. Groten Dank an de Poppenspälerin von dat Tandera Theater.

Dicht’t Gewäuhl herrschte an den´n Bäukerdisch. Dor wier so manchet Schätzchen tau finnen för Lütt un Grot. 

Hartlichen Dank an de Verlage för ehr Mitmåken:

ß-Verlag & Medien GbR, Hinstorff Verlag, Klatschmohn-Verlag, Vorpommersche Verlage, Amiguitos Verlag, Tennemann Verlag, Lexikus Verlag,   Spica Verlag un Bienchen Bianca.

De Heimatverband  hett sick mit interessanten Ideen un Initiativen dorstellt. “Funklock stoppen” tau´n Bispill- de Initiative ut Schleswig- Holstein för mihr Platt in´t Radio un Fernsehen. De Stand wier ok Treffpunkt för interessante un interessierte Gäste. Wecker sick ok mål afsiets von Bühn un Bäukerdisch ümseihn hett, künn’t dor ok uns Oberbürgermeisterin Eva-Maria Kröger drapen. Tau’t gaude Gelingen von den´n Bäuker-dag hemm' ok Kaffe- un Kauken bidragen. Välen Dank, leiwe Vereinsmaaten, för Juch Kaukenspennen. Nich ein Krümel Kauken is öwrig bläben. Wi wullen uns ok bi de Frugens von´n Botanischen Gorden bedanken för den Kaffe- un Kaukenverköp un bi all de annern Helpers von’n Botanischen Gorden, de dissen Dag möglich makt hemm'.

De 9. Bäukerdag bi Kaiserwäder in den´n wunnerboren Botanischen Gorden wier ein gelungenet Begäfnis un wi freuen uns all up den 10. Plattdütsch-Bäukerdag.  

                                                                 Text: Gerlinde John un Jürgen Wittmüß

Fotos

Hartmut Christoph, Eva Dittberner un Gerlinde John