8. Plattdütsch-Bäukerdag in´n Botanischen Gorden

Dat wier nu dat achte Mal, dat de Plattdütsche Bäukerdag in´n Botanischen Gorden dörchführt wür. Dat Wärer hett uns ierst Sorgen makt, oewer dat hett sick gaut holl´n. Väle Minschen, de sick för Plattdütsch interessieren, sünd ut Rostock, Ümgäbung un ok von wiether kamen, üm in dissen schönen Gorden de Baukpräsentation tau besäuken.

Dei Heimatverband M/V wier ok dorbi un so as bi dei annern Bäukerdaag hett Werner Brinckmann wedder dorför sorgt, dat allens orrig aflöp. De Eröffnungsanspraken würden holl´n von Prof. Dr. Stefan Porembski, Werner Brinckmann un  unsen Vörsitter Jürgen Wittmüß. Unse Ministerpräsidentin Manuela Schwesig wier de Schirmherrin.

Organisiert un dörchführt wür disser Dag wedder von´n Botanischen Gorden, von´n Frünnkreis Botanischer Gorden, von´n Heimatverband Mecklenburg-Vorpommern e.V. un von uns´n Plattdütsch-Verein. De Vörbereitung un Dörchführung hett väl Arbeit makt un Tiet brukt un Werner Brinckmann hett dat wedder mit väl Kraasch un Iewer schafft. Väle Maaten un Frünn´ hemm´   düchdig hulpen. Dor wür Kauken backt, grillt, de Bäukerdische den ganzen Dag besett´t un plattdütsche Autoren hemm´ ehre Geschichten vördragen. Dorför hartlichen Dank! Ditmal wieren väle Lüüd kamen un sei hemm´ gaut tauhürt un orrig Bifall gäben. In´n ganzen Gorden wieren de Gäst verträden un hemm´ sick de Planten, Böm un de schöne Anlag ankäken. Ein poor Spenn´ för dat Sukkolentengewächshus sünd ok tausamen kamen. Unse Maatin Margrit Krabbe spenn´te spontan 50,00€ un Eva köffte dat schöne Klöppelbild von Bärbel Brinckmann, dat sei ok för den Bot. Gorden spenn´t har.

12 Verlage  präsentierten ehre Bäuker un so manch ein Bauk wesselte sienen Besitter. De Autorenläsungen un de Uptritte von Wolfgang Kniep un Anke Gohsmann wieren sihr ünnerhollsam. Sei bröchten de Tauhürers dat wunnerschöne Bauk „Klia“ nähger. Ein Märken för grote un lütte Wunnerkinner, för dat dat ok all ein Drehbauk för ´ne Hörspälversion gifft. Up de Bühn 2 kamen de Kinner tau Wurt un bröchten lütte plattdütsche Programme. Sei sünd uns Nahwuchs un wi freuen uns, dat de Öllern un de Lihrers sick för unse schöne Sprak insetten un sei föddern. Ein lüttet Puppenspäl hett dat ok all gäwen. Disse schöne Veranstaltung hett alle Bedeiligte väl Freu makt. Dat geef ok wedder den Unkel-Bräsig-Pries, de ditmal an den Schriewer Jürgen Pump güng. Jürgen Pump kümmt von de Insel Poel. Hei schrifft plattdütsche Kortgeschichten un Sachbäuker tau de Poeler Inselgeschicht. Hartlichen Glückwunsch tau disse Utteiknung. Väle Kinner hemm´ sick up de Bühn 2 infunnen un sick dat Puppen-späl ankäken. Dat geef väl Bifall un de Kinner makten orrig mit.

Ick mücht hartlich Dank seggen!

De 8. Plattdütsch-Bäukerdag wier miene letzte Rull as Veranstaltungsleiter. Ick mücht den´n Vörstand un den Vereinsmaaten von´n Plattdütsch-Verein „Klönsnack-Rostocker 7‟ e.V. för de grotorrige Ünnerstüttung un Tausamenarbeit för all de Plattdütschen-Bäukerdaag un de Plattdütsche Kulturwoch von´n 03. Juni bet 10. Juni 2018 recht hartlichen Dank seggen.   Ick wünsch Juch för de Taukunft allens Gaude. Bliewt gesund un hollt Juch fuchtig.

 Platt snacken – dat is Heimat!  Adschüß seggt Werner Brinckmann!

Leiw´ Werner,

ok de Vörstand un de Maaten von´n Plattdütsch-Verein “Klönsnack-Rostocker 7” e.V. bedanken sick hartlich bi Di för de gaude Vörbereitung un Dörchführung von disse schönen Veranstaltungen. Wi wünschen Di wiererhen allet Gaude un bliew gesund. Dank seggen ok de Heimatverband, de Vörstand un de Frünn´ von´n Bot. Gorden, de Autoren un de Verlage.

Fotos: Eva Dittberner und Hartmut Christoph