"799 Jahre Rostock" -Stadtrundgang

Petrikirche, Alter Markt 18055 Rostock

Unse  Heimatstadt Rostock fieerte an 24. Juni 2017 ehren 799. Geburtsdag. Dat heit, vör 799 Johren hett sei dörch Borwin I. de Stadtrechtsbestätigung krägen. Dat geiht nu ümmer fixer up de 800-Johrfieer tau un de Vörbereidungen sünd in´n vullen Gang. Wie ümmer geef dat ´nen Stadtründgang oewer 7 Stationen.

De 1. Station wier de St. Petrikark mit Begrüßung dörch Klaus Armbröster und Eröffnung dörch unsen Oberbörgermeister, Roland Methling. Hier wier ok dörch de Nedderdütsche Bühn un Maaten von unsen Plattdütsch-Verein de "Slüterhochtiet" upführt. Väle Lüüd wieren in de Kark un dat geef orrig Bifall.

De nächst Station wier de Hochschaul för Musik un Theater. De Vördrag von´n Paster Dr. Reinhard Scholl "Frei zur Bildung" wier sihr interessant.

De 3. Station wier de Rathusvörbu un de Niege Markt. Hier hett Klaus Armbröster von´n Stadtführerverein ´nen Vördrag oewer  "Christus as Weltenrichter un oewer den Kak  up den Niegen Markt" vertellt. De Kak wier de Pranger orrer Schandpahl. An´n Rathus wier ´ne niege Klock anbröcht, de trüchwarts löppt un anteikt woväl Dag bet tau uns 800-Johrfieer  bliwen.

Nu güng dat tau de Marienkark as 4. Station. Den Vördrag "Frei im Gewissen" höll wedder Paster Dr. Reinhard Scholl. De Stadtrundgang wier ümmer begleit´t von de Schützengesellschaft Concordia von 1848. Dat Bild wiest sei vör de Marienkark. In de Mitt steiht Thomas C. v. Widdern.

De 5. Station wier de Heiligengeisthof. Dor hett Klaus Armbröster ´nen Vördrag holl´n oewer "Heiligengeist-Hospital und die fünfschiffige Hospitalkirche".

Vör dat Universitätsgebäud as 6. Station geef dat ´nen Vördrag von Steffi Schmidt, Theologische Fakultät "Erinnerung an bedeutende Theologen der Universität Rostock". Sei stünn´ genau ünner dat Blücherdenkmal.

De 7. un letzt Station wier dat Kulturhistorische Museum ehem. Kloster zum Heiligen Kreuz. `Nen interessanten Vördrag hett dor de Direkter von´n Kulturhistorischen Museum, Dr. Steffen Stuth, holl´n. Sien Thema: "Frei zur Selbstbestimmung".

Dat wier wedder mal ein schöner Stadtrundgang.  Man hett väl seih´n un ok väl dortau liehrt. An all de Stationen geef dat korte Bidräg tau Rostocks Stadtgeschichte un tau de Reformation.

Begleit´t würd de Rundgang von de Schützengesellschaft Concordia von 1848, de sick mit historische Kledasch as "Stadtsoldaten" verkleid´t hemm´.

Vörbereit´t un dörchführt wür de Stadtrundgang dörch den Rostocker Stadtführerverein  e.V., den Verein för Rostocker Geschichte e.V. un den Plattdütsch-Verein "Klönsnack-Rostocker 7" e.V.

 

Fotos: Hermann Peters, Hartmut Christoph und Eva Dittberner

Stadtrundgang tau de 799-Johrfieer von de Hansestadt Rostock

 

Zurück