6. Plattdütsch-Bäukerdag in´n Botanischen Gorden

Botanischer Garten, Hamburger Str. 28 18069 Rostock

6. Plattdütsch-Bäukerdag in´n Botanischen Gorden

Dat wier nu dat sösste Mal, dat de Plattdütsche Bäukerdag in´n Botanischen Gorden dörchführt wür. Dat Wärer wier ´n bäten dörchwussen un ein poor Rägendruppen kämen ok. Väle Minschen, de sick för Plattdütsch interessieren, sünd ut Rostock, Ümgäbung un ok von wiet her kamen, üm in dissen schönen Gorden de Baukpräsentation tau besäuken. Dei Heimatverband M/V wier ok dorbi un so as bi dei annern Bäukerdag hett Werner Brinckmann wedder dorför sorgt, dat allens orrig afleep. De Eröffnungsanspraken würden holl´n von Prof. Dr. Stefan Porembski, Prof. Altenhofen ut Brasilien, Werner Brinckmann un  unsen Vörsitter Jürgen Wittmüß.  Moderiert hett natürlich "Schletti".

Organisiert un dörchführt wür disser Dag wedder von´n Botanischen Gorden , von´n Frünnkreis Botanscher Gorden, von´n Heimatverband Mecklenburg-Vorpommern  un von unsen Plattdütsch-Verein. Väl Arbeit   hett   sick Werner Brinckmann makt, üm dissen   Dag tau  veranstalten. All´s wier grotorrig vörbereit´t. Väle Maaten un Frünn´ hemm´   düchdig hulpen. Dor wür Kauken backt, grillt, de Bäukerdische den ganzen Dag besett´t un plattdütsche Autoren hemm´ Geschichten vördragen. ´Ne grot Oewerraschung wier de Bekanntgaw´ von dat  platt-dütsche Wurt von 2019. Insend´t wier dat Wurt „Utklamüstern” von uns´n Vereinsmaat Marco Höster. Hei hett ein lütt Präsent krägen un vertellte, wat hei mit de plattdütsche Sprak tau daun hett. Hartlichen Glückwunsch leiw´ Marco! De plattdütsche Rädensort wier: „He röögt dat Muul as de Katteiker den Steert”.

De „Folkloregrupp Nuurdwind” makte tau Instimmung ein lütt Programm mit schöne plattdütsche Leeder, besonners von Ilse Frentz. Schletti bröchte de Gäst orrig tau´n Hoegen. Sien Humor in Verbinnung mit Plattdütsch is wat Fienet. Dat geef ok wedder den Unkel-Bräsig-Preis, de ditmal an den Schriewer un Rutgäwer von den´n „Voß un Haas Kalenner” , Hartmut Brun gahn is. Hartlichen Glückwunsch!

Klaus Jürgen Schlettwein bekeem von Werner ´ne Utteiknung för den  plattdütschen „Mann des Jahres” un Werner Brinckmann hett dörch Dr. Götze, Kustos von´n Bot. Gorden, ´ne Ihrenurkunn´ för siene gauden Leistungen för den Bot. Gorden krägen. Dat geef duernd grote Oewerraschungen.

13 Verlage  präsentierten ehre Bäuker un so manch ein Bauk wesselte sienen Besitter. De Aurorenläsungen un de Uptritte von Wolfgang Kniep un Anke Gohsmann wieren sihr ünnerhollsam. Dat geef väl Bifall. Denn freuten sick all up de Kinnergruppen, de mit ehre plattdütsche Bidräg de Lüd in Stimmung bröchten. Tauierst keem de Kinnergrupp von´ne Kita mit Fru Hübl. De makten all´s akkerat. Sei stellten sick vör, danzten un süngen. Dorna keem Christine Stübe mit de Kinner ut de Grundschaul „An den Weiden” Toitenwinkel un mit gröttere Kinner von de Hunnertwasser Gesamtschaul Lichtenhagen , de mit den´n Rapper Tino wat inäuwt hemm´. Dat hett uns all sihr freut. Tau´n Afschluß sünd de „Spöökenkiekers” mit ein zünftig Programm upträd´t. Dat hett nochmal all von´n Hocker räten. Werner Brinckmann bedankt sick hartlich bi den´n Plattdütsch-Verein "Klönsnack-Rostocker 7" för de gaude Ünnerstützung. 

"Plattdütsch läwt!"

 

 

Text: Eva Dittberner

Fotos: Hermann Peters, Eva Dittberner

Zurück