WIR LIEBEN COOKIES
56. Toitenwinkler Klönsnack
Alte Schmiede, Hölderlinweg 20 18146 Rostock / Toitenwinkel
Dulle Stimmung bi´n 56. Toitenwinkler Klönsnack
Egentlich sallte de 56. Toitenwinkler Klönsnack up den´n oewerdachten Hoff von de „Alten Schmiede“ dörchführt warden. De Hitt wier aewer so grot, dat de Stadtdeilmanager, Jens Anders, de Veranstaltung in den ´n bäten käuhleren Mehrzweckrum verleggte. Üm de 30 Frünn´ von de beleiwte Veranstaltung wieren dor. Sei stärkten sick ierstmal mit sülwstbackten Kauken un gauden Kaffe.
Dorna geef dat ein schönet Plattdütsch-programm, dat fast eineinhalf Stunn´ duerte. Vörbereit´t wier dat dörch Jörg Bitter un den´n Musiker Jens Anders. Jörg hett väle ünnerscheidliche Texte mitbröcht. Dorbi wieren ok Stücke von oewerregionale Plattdütsch-Autoren, besonners bröchte hei aewer Geschichten un Gedichte von Wolfgang Mahnke un Ilse Frentz. Sihr gaut ankamen is Jörg mit siene eigenen Gedichte. Dorför geef dat väl Bifall. Dat sallt em orrig Maut maken, üm wiererhen as Autor tau de Pläg von unse wunnerschöne plattdütsche Sprak bitaudrägen. Jens harr väle Leeder vörbereit´t, de tau´n Mitsingen inlad´t hemm´. De Gäst makten düchdig mit.
Na gaut twei Stunn´ seggten all „tschüss“ un güngen gaut gelaunt nach Hus. Bi de nächst Veranstaltung an´n 20.10.22 wull´n all wedder dorbi sien.
Text: Jens Anders
Fotos: Frank Schubert
