Plattdütscher Bäukerdag

Dat wier nu dat föfte Mal, dat de Plattdütsche Bäukerdag bi schönet Wärer in´n Botanischen Gorden dörchführt wür. Väle Plattdütschfrünn´ un wecke, de dat warden wull´n, sünd ut Rostock, Ümgäbung un ok von wiet her kamen, üm in dissen schönen Gorden de Baukpräsentation tau besäuken.

Dei Heimatverband MV wier ok dorbi un so as bi dei annern Bäukerdag hett Werner Brinckmann wedder dorför sorgt, dat allens orrig afleep. De Eröffnungsanspraken würden holl´n von Prof. Dr. Stefan Porembski, Fru Dr. Cornelia Nenz, Herrn Mathias Rautenberg von´n Bildungsministerium Schwerin un unsen Vörsitter Jürgen Wittmüß.  Moderiert hett natürlich "Schletti".

Organisiert un dörchführt wür disser Dag von´n Botanischen Gorden , von´n Frünnkreis Botanischer Gorden, von´n Heimatverband Mecklenburg-Vorpom-mern  un von unsen Plattdütsch-Verein. Väl Arbeit hett   Werner Brinckmann hat, üm dissen  grotorrigen Dag tau veranstalten. Dor hett all´s passt. Väle Maaten un Frünn´ hemm´  ok düchdig hulpen. Dor wür Kauken backt, grillt, de Bäukerdische den ganzen Dag besett´t un Autoren hemm´ ehre Geschichten läst.

De Grupp Nuurdwind un de Plattsnacker hemm´ ok ein lütt Programm makt. Besonners gaut sünd de beiden jungen Lüüd, Ole un Fenja mit ehre plattdütschen Riemels un Leeder ankamen. Schletti un Tennemann bröchten mal wedder de Gäst tau´n Hoegen. Dat geef ok wedder den Unkel-Bräsig-Pries, de ditmal an den Schriewer un Leedermaker Wolfgang Kniep gahn is. Hartlichen Glückwunsch!

 De 5. Plattdütsche Bäukerdag wier de Uptakt von ´ne ganze Plattdütsche Kultur-woch von´n 03. bet 10. Juni 2018. Acht interessante Veranstaltungen mit Musik un plattdüt-sche  Ünnerhollung tau Ihren von uns Vadderstadt Rostock hett dat gäben.

11 Verlage hemm´  ehre Bäuker präsentiert un dat wesselte ok so manch ein Bauk sienen Besitter.  7 Autoren (Klaus Dieter Kaie, Wolfgang Kniep, Björn Berg, Susanne Bliemel, Wolfgang Mahnke, Hartmut Brun un Cornelia Jost) lästen ut ehre Bäuker un de Gäst hürten nipping tau. Dat geef väl Bifall.

Ein hartlichet Dankeschön geef dat an Werner Brinkmann un an siene Fru Bärbel.

Fotos:

Dr. Götze, Hermann Peters, Hartmut Christoph, Renate Anders, Eva Dittberner