4. Plattdütsch-Bäukerdag

Botanischer Garten, Hamburger Str. 28 18069 Rostock

Behrend Böckmann seggt:

Ja, dat is so! As Besäuker un Schriewersmann wier ik taun vierten Mål dorbi un künn beläben, dat Plattdütschfrünn ut Rostock, œwer ok von wiet her kåmen sünd, üm nich blot den Botanschen Gorn, sonnern ok den Plattdütschen Bäukerdag in 'ne wunnerbore gräune Ümgäbung tau besäuken.

Künn man in Botanschen Gorn up Tafeln all läsen, woans männig Plant up Platt heiten deit, so keemen 2014 dei Botansche Gorn as Deil von ´ne Universität, dei plattdütsche Fründeskring von'n Botanschen Gorn un dei Plattsnackerkring „Klönsnack Rostocker 7“  œwerein, taun „Plattdütschen Bäukerdag“ in´n Botanschen Gorn intaulåden. Dat keem an, måkte Schaul un so güng't wieder. Nu wier't an'n 21. Maimånd taun vierten Mål so wiet. Dei Heimatverband MV wier ok dorbi un so as bi dei annern Bäukerdag hett Werner Brinckmann wedder dorför sorcht. dat allens so afleep, as dat vörseihn wier. Hei hett in't Ministerium wägen dei Schirmherrschaft von Kultusministerin Hesse vörspråken, hier un dor bi Geldgäwer un Sponsoren dei Kniep upgåhn låten, dat Programm tausåmenstellt, Lüüd funnen, dei Kauken backen. Kaffe kåken, an'n Grill ståhn...Un för den Dag sülben mössten Disch un Stäuhl, Telten un dei Bäukerdisch ståhn un dei Technik upbuucht warden...Dor wiern Schiller uptaustellen, dei Medien intauladen un dat Schlœtelbund von'n Botanschen Gorn an sik tau hollen...    

Klock teihn keem dei Erlösung. Klaus-Jürgen Schlettwein, taun 4. Mål Bäukerdag-Moderator, heit up sien lustig Ort dei Gäst un Ihrengäst willkåmen un bestellt ok dei besten Gräut von Ilse Frenz, dei ut Ollersgrünn nich mihr kåmen kann. Hei finndt t ok 'ne Uträd' för den einen un annern Gast, dei up'e List stünn un sik nich tiedig nauch orrer gor nich seihen leet. Dei Gastgäwer wünschen ok all Gäst allens Gaude för den Dag un denn weih´n dei Nuurdwindstimmen mit platt-dütsche Leeder dörch 'n Gorn.

An'n Bäukendisch hemm' 12 Verlage un Vereine ehr Angebot utlecht.

In't Läs-Theoter fangt Hans Peter Hahn tau vertellen an un 7 anner Schriewerslüüd warden nå em läsen. Tau dei Meddachstiet is 't denn so wiet: Herr Zabel, Chef von't Literaturmuseum in Stemhagen un Fru Nenz, dei Vörsiddersch von'n Heimatverband MV verkünnen, dat „Dwarsdriewer“ dat Plattdütsche Wurt 2016, „Büdelfleiger“ dei aktuelle plattdütsche Utdruck un „Kumm rin un snack di ut, gah rut un hol din Snut“ dei leiwste Rädensort is.

Joachim Kleffe un Johanna Bojarra mit ehr Kinnergruppen leeten uns weiten, dat Plattdütsch läwt un so austen sei dorför väl Bifall. Un middenmang ümmer wedder dat Original Mariken ut Warnemünn mit ehrn Korf vull von Reuter-Schokelor.

Uprümen keem taun Enn' noch up all dei flietigen Helpers tau, denn man wull den Botanschen Gorden so verlåten, as man em vörfunnen harr. Mit un åhn Updrach sech ik Dank an all dei gauden Geister un ver-binn´ dat mit'n Wunsch, dat dat ok wiederhen den „Plattdütschen Bäukerdag“ in'n Botanschen Gorn gifft.

Behrend Böckmann

 

 

 

Fotos: Hermann Peters, Hartmut Christoph, Eva Dittberner und Holger Ahrens

Bäukerdag bi Sünnenschien,

dor künnt't gor nich anners sien,

dat sik dei ganze Plattdütsch-Welt

in'n Botan'schen Gorn instellt.

 

 

Zurück