3. Plattdütsch-Bäukerdag

Botanischer Garten, Hamburger Str. 28 18069 Rostock

Organisiert un dörchführt würd disser Dag von´n Frünnkries Botanscher Gorden un unsen Plattdütsch-Verein. Mit väle Ideen, Energie un Arbeit hett Werner Brinckmann ´nen grotorrigen Dag veranstalt´t. Dor hett all´s passt. Väle Maaten un Frünn´ hemm´ ok düchdig hulpen. Dor würd Kauken backt, grillt, de Bäukerdische den ganzen Dag in groter Hitt besett, Autoren hemm´ ehre Geschichten läst, Joachim Kleffe un Johanna Bojarra mit ehre Plattdütschkinnings wieren dor. De Grupp Nuurdwind un de Plattsnacker hemm´ok ein lütt Programm makt. Schletti un Tennemann bröchten de Lüd tau´n Hoegen un de Bildungsminister, Mathias Brodkorb hett verspraken, dat Projekte för Plattdütsch in Kinnerinrichtungen un Schaulen makt warden un dat ok de Finanzen dorför dor sünd.
Dat geef ok wedder den Unkel-Bräsig-Pries, de ditmal an den Schriewer, Wolfgang Mahnke, güng. Hartlichen Glückwunsch!
Mihr möt ick nich seggen, denn Dr. Behrend Böckmann hett ´nen Riemel dorut makt.

Bäukerdach 2016
von Dr. Behrend Böckmann

Dat Wäder künn nich bäder sien,
An dissen Dach bi Sünnenschien
Un Petrus wier dei grote Held
För dei plattdüütsch Bäukerwelt,
Hei leet kein Wåder rünnerkåmen,
Un männigein hett Tiet sik nåhmen,
Un bi schönste Sünnenstunnen
In’n Plantengorn Verhålung funnen.

Taun drüdden Mål, dat mœt man fåten
Hemm’ Uni un uns Klönsnack Maaten
Un dei Kring för’n Plantengorn
Ok mit Hülp von dei Sponsor’n
Einen Bäukerdach utricht,
Wecker måkt plattdüütsch Geschicht,
Hei keem dit Johr tau gröttste Ihr,
Dor ’n „Brodkorff“ Schirmherr wier.

Tiet hett sik dei Minister nåhmen,
Hei is ok up dei Lüüd taukåmen
Un mitenanner wür parliert,
Woans man hüt denn Platt noch lihrt.
As båben denn uns Klärchen lacht
Hett’s ok an Werner Brinckmann dacht,
Dei dorför is all gaut bekannt,
Dat hei hett allens inne Hand.

An einen groten Bäukerstand
Geef’t plattdüütsch Bäuker ut uns Land
Un männig plattdüütsch Schriewersmann
Lecht Tüchnis af, wat Plattdüütsch kann,
Döntjes un ok iernste Såken,
Allens lött up Platt sik måken
Un sülfst lütt’ Kinnings hemm’ vertellt,
wat schön is doch dei plattdüütsch Welt.

Zurück