10. Bäukerdag in´n Botanischen Gorden

Dat wier nu dat 10. Mal, dat de Plattdütsche Bäukerdag in´n Botanischen Gorden dörchführt wür. De Bäukerdag is all ein fest Bestanddeil von de Plattdütschen Wochen, wecke all dat 4. Mål von den Heimatverband veranstaltet wur´n. Wi harr´n würklich Glück mit dat Wärer. Is doch klor, wenn de Plattdütschen fieern, schient de Sünn.

Uns  Vörsitter, Jens Anders, eröffnete den Bäukerdag, de Ministerin för Wissenschaft un Kultur, Bettina Martin, hett ´ne Räd hollen. De Präsidentin von de Rostocker Börgerschaft un Fru Dr. Cornelia Nenz, stellv. Vörsitterin von´n Heimatverband, hemm´ de Gäst begrüßt un ok Prof. Poremski, de Direktor von’n Botanischen Gorden, hett ‘n por nette Wür´ tau Begrüßung seggt. Na de Begrüßung geef dat ´ne besonnere Utteiknung för unsen Präsidenten un Grünner von den Plattdütschverein, Uwe Süssmilch. Hei wür mit den´n “Onkel-Bräsig-Preis” utteiknet. Dat wier viellicht ´ne Oewerraschung för Uwe.

De Laudatio hett Wolfgang Mahnke holl´n. Sihr schön hett heit dat makt. Hei hett seggt: „Dat sall em ierst einer nahmaken, fast ein ganz Läwen för Kultur un Plattdütsch!‟                                

Uwe hett sick orrig freut. Wi gratelieren hartlich!

`Ne korte Ansprach hett ok Jette Bolz, de Botschafterin för Nedderdütsch holl´n.

Na de musikalsche Begrüßung von unse Vereinsmaaten Anke Moll un Hans-Jürgen Schulze  hemm´ sick junge Plattsnacker  un Leedermaker vörstellt. Dortau gehürten Annka Prosa mit  Keyboard un ehren schönen Gesang un wiedere Plattsnacker. Johanna Bojarra hett sei begrüßt un utfragt, wat sei so maken un wie sei sick för de plattdütsche Sprak insetten. Disse jungen Lüüd harr´n gaude Ideen.

De Autoren un Verlage sünd giern wedder tau´n Bäukerdag kamen. De Verlagsmitarbeiter hemm´ sick mit de Lüüd, de sick för de plattdütschen Bäuker interessierten ünnerholl´n un so manch ein Bauk wesselte den Besitter.

Ditmal geef dat twei plattdütsche Veranstaltungen in´n Botanschen Gorden. Dat wier uter den´n Bäukerdag ok noch´n Familienfest. Dor wier allerhand los. Up de ein Bühn lästen afwesselnd de inlad´ten Autoren ut ehre plattdütsch Bäuker.

- Wolfgang Mahnke,- Duo Anke Gohsmann un Wolfgang Kniep,- Dr. Behrend Böckmann, - Heidelore Rumler,- Bernd Lubs,- Andreas Dietzel.

De Tauhürers wieren begeistert un hemm´ väl Bifall gäben. Hartlichen Dank an alle Autoren. 

Unse Oberbörgermeisterin, Eva-Maria Kröger, hett ok den Bäukerdag besöcht un dorbi Uwe tau siene Utteiknung grateliert. Kort vörher hett Thomas C.v. Widdern mit ehr ein kortet Interview tau de Pläg von de plattdütsche Sprak makt. Ehre Ünnerstüttung hett sei uns tauseggt.

Up de Bühn 1 makte de Folkloregrupp Nuurdwind den Afschluss. Dat hemm´ sei wedder wunnerbor makt. Sogor ´ne Taugaf wür von dat Publikum verlangt.

So ein schöner Bäukerdag mit Kaiserwärer, fründliche Minschen, väle Helpers, Catering, sülwstbackten Kauken un gaude Programme. Dankeschön!

Fotos: Hartmut Christoph un Eva Dittberner