Grillnahmeddag von unsen Plattdütsch-Verein

Botanischer Garten, Hamburger Str. 28 18069 Rostock

Ditmal wier schönet Wärer un wi künnten unsen Grillnahmeddag buten dörchführ´n. Jedet Johr, kort för de Sommerpaus, is dat ein Höhepunkt för unse Maaten un de gräune Ümgäbung in´n Botanschen Gorden is wat Fienet.

Väle Maaten sünd kamen un ok ´n poor unerwartete Gäst. Dat hett oewer för all reikt.

Wi harr´n je ok all´s gaut vörbereit´t un inköfft. Dat geef wat tau Drinken, mit un ahn Alkohol. Tau´n Äten wier Bratwust un Grillfleesch dor. Tüftensalat wier ok dorbi un unse Maatin Heidrun Rother hett ´nen lecker Reissalat makt, von den´n nix oewerbläben is. Gerhard Goldammer hett de Wust un dat Fleesch wedder grillt un dat hett hei sihr gaut makt. De Frünn´ von´n Botanschen Gorden hemm´ düchtig bi de Vörbereitungen hulpen. Dor wieren de Dische un Stäuhle upstellt. De Grill un dat Geschirr halt un de Holtkahl anmakt. Dorför hartlichen Dank. Ein hartlichet Danke-schön keem an Werner Brinckmann för de Vörbereitung un Dörchführung von´n Bäukerdag un de plattdütsche Woch tau Ihren von den 800. Johresdag von uns Heimatstadt Rostock. Ok de Maaten un Maatinnen, de ehre Tiet bi de Pingstdag för den MV-Dag opfert hemm´, kreegen ´ne lütt Anerkennung, de von´n Heimatverband keem.

Werner Brinckmann hett flietig bi de MV-Dag Spenn´ för de Vereinsmaaten, de Plattdütschünnerricht mit de Kinner in KITA´s un Schaulen maken, insammelt un an Holger Ahrens un Christine Stübe oewergäben. Jörg Bitter wier nich anwäsend un kriegt sienen Ümschlag späder. Dor wier de Freu grot un ok as Ansporn seih´n ,de Kinner dat Plattdütsche wiererhen tau lihren. Christine hett sick hartlich bi Werner bedankt.

An dissen Nahmeddag harr´n wi up einmal söss niege Vereinsmaaten gewunnen. Sei fäuhlen sick all lang mit unsen Verein verbunnen dörch dat Maandenbladd un dörch de Veranstaltungen in de K-D-Stuw´. Dat wieren: Eckhardt Maibauer, Karin Münchow, Dorit Schröder, Franziska Blume, Heidi Höfs un Ilse Melle. Wi seggen: "Hartlich willkamen."

Na dat Äten is dat orrig komodig wor´n. De Plattsnacker makten ein zünftig Programm, de Muskanten hemm´ ehr Bestet gäben un Marco, Wilhelm un Christa wieren ok mit von de Partie. Leiwe Gäst hemm´ wi ok von´n Botanschen Gorden un von´n Heimatverband hatt. Bi de wi uns hartlich för de gaude Ünnerstützung bedanken.

Tau´n Afschluß von unsen schönen Grillnahmeddag ward as ümmer uns heimlich Nationalhymne sungen "Wo de Ostseewellen trecken an den Strand". All hemm´ mitsungen un sünd denn satt un taufräden na Hus gahn.      

                                                                                             Eva Dittberner

 

 

Fotos: Hartmut Christoph, Holger Ahrens, Hermann Peters

Ein zünftiger Grillnahmeddag mit Musik un Snacks up Platt.

 

Zurück